Government of Canada | Gouvernement du Canada
Symbol of the Government of Canada | Symbole du gouvernement du Canada

ᓄᓇᕐ ᔪᐊᕐᑕ ᑲᔾ ᔨᐊ ᐊᕐᕌᒍᐊ ᖃᓄᐃᓕᖓᓕᕐᓂᖓ




Version Inuktitut PDF Format (619 Kb, 10 Pages)

To read the electronic version of a document in PDF format, you will need to use Acrobat Reader. You can download   and install the free reader from the Internet Website of Adobe Systems Incorporated.

Please visit Access Adobe   to help make PDF files accessible to screen reading utilities. These tools convert Adobe PDF documents into HTML or ASCII text which can then be read by a number of common screen reading programs that synthesize text as audible speech.






Table of Contents






ᐆᒫᔪᐃᑦ

ᖃᐅᔨᓴᕐᓂᖅ ᐊᑦᑐᐊᓂᕋᐃᔾᔪᑕᐅᕗᖅ ᓯᓚᐅᑉ ᐊᓯᕈᕐᓂᖓᓂᒃ ᐊᒻᒪ ᓇᓄᐃᑦ ᓂᕆᔾᔪᓯᖏᑦ

ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᖃᐅᔨᓴᕐᓂᖅ ᓄᓇᕗᒻᒥ ᓴᖅᑭᕈᑕᐅᕗᖅ ᓯᑯᐃᖅᓴᕋᐃᓐᓂᖅᓴᐅᖃᑦᑕᕐᓂᖓ ᐊᓯᕈᖅᑎᑦᑎᓂᖓᓂᒃ ᓂᕿᑦᓴᖃᕐᕕᖏᑕ ᐊᕙᑎᖓᓂᒃ ᐱᖓᓐᓇᖅᐸᓯᐊᓂ ᑕᓯᐅᔭᕐᔪᐊᑉ ᓇᓄᐃᑦ ᐊᒻᒪ ᐱᑕᖃᓕᖅᐸᓪᓕᐊᓂᖏᓐᓂᒃ ᓱᕈᕐᓇᖅᑐᑦ ᓇᓄᕐᓂ. ᖃᐅᔨᓴᖅᑎᑦ ᖃᐅᔨᓚᐅᖅᐳᑦ ᐊᓯᕈᕐᓂᖏᑦ ᖃᖓᒃᑯᑦ ᐊᕐᕌᒍᑕᒫᑦ ᓯᑯᐃᖃᑦᑕᕐᓂᖓ ᓇᓄᓐᓄᑦ ᐱᓇᓱᖃᑦᑕᕈᑕᐅᓕᕐᓂᖓᓄᑦ ᐊᔾᔨᒌᓐᖏᑦᑐᓂᒃ ᓇᑦᑎᕐᓂᒃ. ᑖᓐᓇ ᓯᕗᓪᓕᖅᐹᖅ ᖃᐅᔨᓴᕐᓂᖅ ᐊᑦᑐᐊᓂᕋᐃᔾᔪᑕᐅᓪᓚᕆᑦᑐᖅ ᓯᓚᐅᑉ ᐊᓯᕈᕐᓂᖓᓂᒃ ᐊᒻᒪ ᓱᕈᕐᓇᖅᑐᑖᕐᓂᖏᓐᓂᒃ ᐆᒪᔪᑦ ᓄᖑᔭᓐᖏᑦᑐᓄᑦ ᓱᕈᕐᓇᖅᑐᓄᑦ, ᑕᒪᒃᑮᒃ ᐱᒻᒪᕇᒃ ᓯᓚᕐᔪᐊᓕᒫᕐᒥ ᐊᕙᑎᒧᑦ ᐃᓕᖓᔫᒃ.

ᒪᕐᕉᓐᓂ ᐅᑭᐅᓐᓂ, ᖃᐅᔨᓴᖅᑎᑦ ᓄᐊᑦᑎᓚᐅᖅᐳᑦ ᓱᓇᑐᐃᓐᓇᕐᓂᒃ ᖃᐅᔨᓴᕐᓂᒃᑯᑦ ᐊᒻᒪ ᐃᓄᐃᑦ ᖃᐅᔨᒪᔭᖏᓐᓂᒃ ᒥᒃᓵᓄᑦ ᐊᓯᕈᖅᑐᑦ ᓇᓄᕐᓂ ᐊᒻᒪ ᐊᕙᑎᖏᓐᓂ. ᑕᒫᓃᑦᑐᑦ ᓄᓇᓖᑦ ᐃᓚᐅᓚᐅᖅᐳᑦ ᐊᑕᐅᓯᐅᓐᖏᑦᑐᒃᑯᑦ. ᐃᓕᓴᐱ ᐲᑳᒃ, ᓄᓇᕘᑉ ᒐᕙᒪᖏᑕ ᓇᓄᕐᓂᒃ ᖃᐅᔨᓴᖅᑎᖓᑦ ᐊᒻᒪ ᓱᖅᑯᐃᖅᓯᓇᓱᐊᖅᑎᒻᒪᕆᒃ ᖃᐅᔨᓴᕐᓂᕐᒥ, ᐅᖃᓚᐅᖅᐳᖅ ᑐᕚᖃᒐᔪᖃᑦᑕᕐᓂᕋᖅᑐᓂ ᓄᓇᓕᒻᒥᐅᓂᒃ ᐊᒻᒪ ᖃᐅᔨᒪᔭᖏᓐᓂᒃ ᐱᓪᓗᒋᑦ ᓇᓄᐃᑦ ᐱᐅᓯᖏᑦ. ᖃᐅᔨᓴᖅᑎᑦ ᐱᓕᕆᖃᑎᖃᓚᐅᕆᕗᑦᑕᐅᖅ ᐊᖑᓇᓱᒃᑎᓂᒃ ᐱᓇᓱᒃᑐᑎᒃ ᒪᑯᓂᖓ ᐅᖅᓱᐃᑦ, ᑎᖑᐃᑦ ᐊᒻᒪ ᓄᑮᑦ ᖃᐅᔨᓵᒃᓴᐃᑦ ᓄᐊᑦᑎᓚᐅᖅᑐᓂᒃ 120-ᓂᑦ ᓇᓄᕐᓂᑦ ᒪᕐᕉᓐᓂ ᐅᑭᐅᓐᓂ.

ᓯᕗᓪᓕᕐᒥᑦ ᖃᐅᔨᓴᕐᓂᕐᒥᑦ, ᓱᓇᑐᐃᓐᓇᕐᓂᒃ ᖃᐅᔨᓴᖅᑎᑦ ᖃᐅᔨᒪᓚᐅᖅᐳᑦ ᑕᒪᒃᑯᐊ ᓇᓄᐃᑦ ᓂᕿᖃᓲᖑᓂᖏᓐᓂᒃ ᓯᑯᒦᓲᓂᒃ ᓇᑦᑎᕐᓂᒃ (ᓇᑦᑏᑦ ᐊᒻᒪ ᐅᔾᔪᐃᑦ) ᐊᒻᒪ ᐃᒪᐃᓐᓇᕐᒦᓲᓂᒃ ᓇᑦᑏᕐᓂᒃ (ᖃᓯᒋᐊᑦ ᐊᒻᒪ ᖃᐃᕈᓖᑦ). ᖃᐅᔨᔭᖏᑦ ᓴᖅᑭᕈᐅᓚᐅᖅᑐᑦ ᐊᕐᕌᒍᓂ ᓯᑯᐃᖅᓴᕋᐃᓐᓂᖅᓴᓂ, ᓇᓄᐃᑦ ᓂᕆᓂᖅᓴᐅᓲᖑᔭᕆᐊᖏᓐᓂᒃ ᐃᒪᐃᓐᓇᕐᒦᓲᓂᒃ ᓇᑦᑏᕐᓂᒃ. ᑖᓐᓇ ᐊᓯᔾᔨᕐᓂᖓ ᓂᕆᔾᔪᓯᖏᑕ ᐱᒻᒪᕆᐅᕗᖅ ᖃᓯᒋᐊᑦ ᐊᒻᒪ ᖃᐃᕈᓖᑦ ᓂᕆᕙᓐᓂᖏᓐᓄᑦ ᖁᕝᕙᓯᓐᓂᖅᓴᓂᒃ ᓂᕿᒋᐅᖃᑎᒌᓂ ᐊᒻᒪ ᑕᐃᒪᐃᓐᓂᖏᓐᓄᑦ ᓂᐅᕕᐊᖃᑦᑕᓂᖅᓴᐅᕗᑦ ᓱᕈᕐᓇᖅᑐᓄᑦ. ᓯᓚᐅᑉ ᐊᓯᕈᕐᓂᖓ ᐊᑦᑐᖅᓯᓂᖃᓪᓚᑖᖅᑐᖅ ᐅᑭᐅᖅᑕᖅᑐᒥᒃ ᐊᒻᒪ ᐆᒪᔪᖏᓐᓂᒃ, ᐊᒻᒪ ᓄᑖᖅ ᖃᐅᔨᓴᕐᓂᖅ ᐊᑦᑐᐊᓂᕋᐃᔾᔪᑕᐅᓪᓚᑖᖅᐳᖅ ᐊᓯᕈᕐᓂᖏᓐᓂᒃ ᓯᑰᑉ ᓄᐊᑉᐸᓪᓕᐊᓂᖏᓐᓄᑦ ᓱᕈᕐᓇᖅᑐᑦ ᓇᓄᕐᓂ.


Return to Table of Contents

ᖃᐅᔨᓴᖅᐸᓪᓕᐊᓂᖅ ᑐᒃᑐᓂᒃ ᓇᔪᖅᑕᑎᓐᓂ ᐊᒻᒪ ᓇᒥᑐᐃᓐᓇᖅ ᐅᑭᐅᖅᑕᖅᑐᒥ

ᑲᓇᑕᐅᑉ ᐅᖓᓯᑦᑐᖅ ᐅᑭᐅᖅᑕᖅᑐᖓᑕ ᓄᓇᖓ ᐊᒥᓱᓂᒃ ᐊᕝᕕᐊᕈᑎᑕᖃᕈᑕᐅᕗᖅ ᖃᐅᔨᓴᕐᓂᕐᒧᑦ - ᑕᒪᓐᓇ ᑕᐃᒪᐃᒍᑕᐅᓗᐊᖅᐳᖅ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᑕ ᐊᑑᑎᖃᓪᓚᕆᒃᓯᒪᓂᖓᓄᑦ ᑲᔪᓯᑦᑎᐊᕐᓂᖏᓐᓄᑦ ᐊᒥᓱᑦ ᐅᑭᐅᖅᑕᖅᑐᒥ ᓱᓇᑐᐃᓐᓇᕐᓂᒃ ᖃᐅᔨᓴᕐᓂᕐᒧᑦ ᐱᓕᕆᐊᖑᔪᑦ. ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓ ᐊᑐᕐᓂᖃᓚᐅᖅᐳᖅ ᖃᐅᔨᓴᖅᑎᓄᑦ ᐊᒻᒪ ᓄᓇᓕᓐᓄᑦ ᐅᖓᓯᑦᑐᓂ ᓄᓇᓃᑦᑐᓄᑦ ᐱᓕᕆᖃᑎᒌᒍᑕᐅᓪᓗᓂ ᐱᔾᔪᑎᖃᖅᑐᓂᒃ ᐊᒥᖅᑲᖅᑕᐅᔪᓂᒃ ᓱᓇᑐᐃᓐᓇᕐᓂᒃ ᖃᐅᔨᓴᕐᓂᕐᒧᑦ ᐊᒻᒪ ᐃᓕᖅᑯᓯᕐᒧᑦ ᐱᓇᓱᐊᕈᒪᓂᕐᒧᑦ. ᖃᑦᑏᓐᓇᕈᓗᐃᑦ ᐱᓕᕆᐊᖑᔪᑦ ᑕᑯᒃᓴᐅᔾᔪᑕᐅᑦᑎᐊᓂᖅᓴᐅᕗᑦ ᑕᒪᑐᒧᖓ ᐊᑦᑐᐊᓂᕐᒧᑦ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓ ᑐᒃᑐᐃᑦ ᐊᒻᒪ ᖁᓐᖐᑦ ᓯᓚᕐᔪᐊᓕᒫᕐᒥ ᐊᓯᕈᕐᓂᖏᓐᓄᑦ ᐱᓕᕆᐊᖑᔪᒥᑦ ᐃᓚᐅᕕᐅᓪᓗᓂ ᖃᐅᔨᓴᖅᑎᓄᑦ ᐊᒻᒪ ᓄᓇᓕᓐᓄᑦ ᑎᓴᒪᐅᔪᖅᑐᓂ ᐅᑭᐅᖅᑕᖅᑐᓕᒫᕐᒥ ᓄᓇᓕᕐᔪᐊᓂ.

ᑖᓐᓇ ᓯᓚᕐᔪᐊᕐᒥ ᑲᑐᔾᔨᖃᑎᒌᓐᓂᖓᑦ ᐱᓪᓗᒋᑦ ᑐᒃᑐᐃᑦ ᐊᒻᒪ ᖁᓐᖐᑦ (ᕌᖏᕗ), ᐊᖏᔪᖅᑳᑦ ᐊᒻᒪ ᓄᓇᓕᒻᒥᐅᑦ ᓴᓇᕙᓪᓕᐊᔾᔪᑕᐅᓯᒪᕗᖅ ᓴᓇᕐᕈᑎᓂᒃ ᐊᒻᒪ ᐱᓕᕆᓇᓱᒍᓯᕐᓂᒃ ᖃᐅᔨᓴᖅᐸᓪᓕᐊᓂᕐᒧᑦ ᐊᑦᑐᖅᓯᓂᖏᓐᓂᒃ ᓯᓚᕐᔪᐊᓕᒫᕐᒥ ᐊᓯᕈᖅᑐᑦ ᖃᓂᒋᔮᓃᑦᑐᓂᒃ 20 ᓯᓚᕐᔪᐊᑉ ᖄᖓᓂ ᑲᑎᕆᓂᕐᓂᒃ ᓄᔪᐊᖅᑐᓂᒃ ᑐᒃᑐᓂᒃ. "ᑐᑭᓯᓇᓱᒃᑕᕗᑦ ᓱᓇᑐᐃᓐᓇᐃᑦ ᓱᕐᕋᐅᑎᓂᖃᖅᑐᑦ ᓇᔪᒐᖃᑎᒌᑦ ᖃᓄᐃᓕᕙᓪᓕᐊᖃᑦᑕᕐᓂᖏᓐᓄᑦ ᑐᒃᑐᐃᑦ ᑲᑎᕆᓃᑦ, ᑕᒪᐃᑕᑲᓴᒃ ᑕᒪᒃᑯᐊ ᒫᓐᓇᒃᑯᑦ ᑕᐃᒪ ᖃᑦᑏᓐᓇᕈᖅᐸᓪᓕᐊᒻᒪᑕ," ᐅᖃᓚᐅᖅᑐᖅ ᑖᓐ ᕋᓱᓪ, ᔫᑳᓐᒦᑦᑐᖅ ᐋᖅᑭᒃᓱᐃᔨ ᑳᒪᒃᑯᓐᓄᑦ, ᑖᒃᑯᐊ ᓯᓚᕐᔪᐊᑉ ᖄᖓᓂ ᕌᖏᕗ ᖃᐅᔨᓴᖅᐸᓪᓕᐊᖃᑎᒌᑦ ᐊᒻᒪ ᖃᐅᔨᒋᐊᖃᑎᒌᑦ.

ᖃᐅᔨᓴᕐᓂᖅᑕᖃᖅᑎᓐᓇᒍ, ᐱᓕᕆᖃᑎᒌᓐᓂᖅ ᐱᑕᖃᓕᕈᑕᐅᓯᒪᕗᖅ ᑕᐃᒫᒃᓴᐃᓐᓇᓕᔪᓂᒃ ᐱᓕᕆᔾᔪᓯᕐᓂᒃ ᐊᒻᒪ ᑐᓴᐅᒪᖃᑎᒌᑦᑎᐊᓂᖅᓴᐅᓕᕐᓂᕐᒧᑦ. "ᐊᔾᔨᒌᓐᖏᑦᑐᑦ ᖃᐅᔨᓴᖅᑎᑦ ᓇᒻᒥᓂᕐᒥᓐᓂᒃ ᐆᑦᑐᖅᓯᔾᔪᑎᖃᕐᒪᑕ ᓱᓇᑐᐃᓐᓇᕐᓂᒃ, ᐊᒻᒪ ᓄᓇᓕᕐᔪᐊᑦ ᐱᓕᕆᔾᔪᓯᖃᐅᖅᑐᑎᒃ ᐊᔾᔨᒌᓐᖏᑦᑐᓂᒃ. ᑐᕌᒐᐅᕗᖅ ᐃᓄᓕᒫᓂᒃ ᖃᐅᔨᓴᖅᐸᓪᓕᐊᔾᔪᓯᖃᕋᓱᐊᓕᖅᑎᑦᑎᓂᒃ ᐆᒪᔪᓂᒃ ᑕᐃᒫᒃᓴᐃᓐᓇᖅ," ᐅᖃᓚᐅᖅᑐᖅ ᕋᓱᓪ. ᐆᑦᑑᑎᒋᓗᒍ, ᑳᒪᒃᑯᑦ ᓴᓇᓚᐅᖅᐳᑦ ᖃᐅᔨᒪᔾᔪᑎᓂᒃ, ᑲᑎᑎᖅᓯᒪᔪᓂᒃ ᐊᒻᒪ ᐱᒋᐅᖅᓴᔾᔪᑎᓂᒃ ᑕᕐᕆᔮᓂᒃ ᓄᓇᓕᓐᓄᑦ ᐊᒻᒪ ᖃᐅᔨᓴᖅᑎᓄᑦ ᓇᒥᓕᒫᖅᑐᓄᑦ ᐅᑭᐅᖅᑕᖅᑐᒥ ᐃᑲᔪᕋᓱᐊᖅᑐᒋᑦ ᑎᑎᑦᑐᐃᑎᓪᓗᒋᑦ ᑐᑭᓯᒋᐊᕈᑎᒃᓴᓂᒃ ᒥᒃᓵᓄᑦ ᑎᒥᖏᑕ ᖃᓄᐃᓐᓂᖏᑕ, ᑐᒃᑐᐃᑦ ᐃᓗᓯᖏᑕ, ᑲᑎᕆᓃᑦ ᐊᖏᑎᒋᓂᖏᑕ, ᕿᑐᕐᖏᐅᖅᑐᑦ ᐊᒻᒪ ᑐᖁᔪᑦ ᐊᒥᓲᑎᒋᓂᖏᑕ, ᐊᒻᒪ ᐊᕙᑎᒥ ᐊᓯᕈᖅᑐᑦ ᐊᑦᑐᖅᓯᓂᖃᖅᑐᑦ ᑐᒃᑐᓂᒃ.

ᐃᒻᒪᖃ ᓂᕆᐅᓇᕆᔭᐅᔪᒥᒃ, ᖃᐅᔨᓴᖅᑎᑦ ᖃᐅᔨᓯᒪᕗᑦ ᐊᒥᓱᓂᒃ ᓱᓇᑐᐃᓐᓇᕐᓂᒃ - ᓇᔪᒐᐃᑦ, ᐊᖑᓇᓱᓐᓂᖅ, ᓂᕿᑐᓲᑦ, ᐋᓐᓂᐊᑦ, ᓴᓇᔪᓕᕆᔪᑦ ᐱᕙᓪᓕᐊᑎᑦᑎᓂᖏᑦ, ᓯᓚ, ᓯᓚᐅᑉ ᐊᓯᕈᕐᓂᖓ, ᓱᕈᕐᓂᖅ - ᐊᑦᑐᖃᑦᑕᐅᑎᑐᐃᓐᓇᕆᐊᖃᕐᓂᖏᓐᓂᒃ ᓱᕐᕋᐅᑎᓂᖃᓕᖅᑐᑎᒃ ᑐᒃᑐᖃᕐᓂᖓᓄᑦ. ᒫᓐᓇᑯᓪᓕ, ᐃᓱᒪᕗᑦ ᓂᕿᒃᓴᖏᑦ (ᐱᑕᖃᖅᑎᒋᓂᖏᑦ ᐊᒻᒪ ᐱᐅᑎᒋᓂᖏᑦ ᑐᒃᑐᐃᑦ ᓂᕿᖏᑕ) ᐱᒻᒪᕆᒃᑯᑦ ᐊᐅᓚᑦᑎᑐᐃᓐᓇᕆᖃᕐᓂᖏᓐᓂᒃ ᐊᒥᓲᑎᒋᓂᖏᓐᓂᒃ ᑲᑎᕆᓃᑦ.

ᐊᒥᓱᑦ ᐅᑭᐅᖅᑕᖅᑐᒥ ᓄᓇᓖᑦ ᑐᕚᖃᖃᑦᑕᖅᐳᑦ ᖁᓐᖏᕐᓂᒃ ᐊᒻᒪ ᑐᒃᑐᓂᒃ ᑮᓇᐅᔭᓕᐅᕈᑎᑎᒍᑦ, ᐃᓅᓯᒃᑯᑦ ᐊᒻᒪ ᐃᓕᖅᑯᓯᒃᑯᑦ. ᑕᐃᒪᐃᓐᓂᖏᓐᓄᑦ ᐃᓚᓕᐅᑎᔪᒥᒃ ᖃᐅᔨᓴᕐᓂᕐᒧᑦ ᖃᓄᐃᓐᓂᖏᓐᓂᒃ ᑐᒃᑐᐃᑦ ᐊᓯᕈᖅᐸᓪᓕᐊᔪᒥ ᓯᓚᕐᔪᐊᕐᒥ, ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᖃᐅᔨᓴᕐᓂᕐᒧᑦ ᐱᓕᕆᐊᖑᔪᑦ ᓵᓐᖓᓚᐅᕆᕗᑦᑕᐅᖅ ᖃᓄᖅ ᓄᓇᓖᑦ ᐊᖑᓇᓱᐃᓐᓇᖃᑦᑕᕈᓐᓇᕐᒪᖔᑕ ᐊᓯᕈᖅᐸᓪᓕᐊᓂᖅᑕᖃᖅᑎᓪᓗᒍ. "ᐱᔾᔪᑎᒋᓪᓗᒋᑦ ᐊᑑᑎᖃᓪᓚᕆᓐᓂᖏᑦ ᓄᔪᐊᖅᑐᑦ ᑐᒃᑐᐃᑦ ᐊᒻᒪ ᖁᓐᖐᑦ ᐊᒥᓱᓄᑦ ᐅᑭᐅᖅᑕᖅᑐᒥᐅᓄᑦ ᐃᓄᓐᓄᑦ, ᐱᒻᒪᕆᐅᕗᖅ ᖃᐅᔨᒐᓱᐊᕐᓂᖅ ᖃᓄᖅ ᓴᐳᑎᔭᐅᔪᓐᓇᕐᒪᖔᑕ ᑐᒃᑐᐃᑦ ᐊᑦᑐᖅᑕᐅᔭᓕᕋᐃᑉᐸᑕ," ᐅᖃᕆᐊᒃᑲᓂᖅᐳᖅ ᕋᓱᓪ.

ᖃᐅᔨᓴᖅᑎ ᕋᐃᔭᓐ ᐳᕈᒃ ᐃᓚᐅᕗᖅ ᐱᓕᕆᓪᓚᑖᕐᓇᖅᑐᒧᑦ ᐱᓕᕆᐊᖑᔪᒧᑦ ᓄᓇᕗᒻᒥ ᐱᖃᑎᖃᖅᑐᓂ ᓱᓇᑐᐃᓐᓇᕐᓂᒃ ᖃᐅᔨᓴᖅᑎᓂᒃ, ᐊᓪᓚᓂᒃ ᐊᒻᒪ ᐊᔾᔨᓕᐅᕆᔨᓂᒃ ᐱᓕᕆᐊᖃᖃᑎᒌᑦᑐᓂᒃ ᑐᒃᑐᓄᑦ ᓇᓗᓇᐃᔭᐅᔾᔪᑎᒥᒃ. "ᕌᖏᕗ ᑎᒥᖏᓐᓄᑦ ᓇᓗᓇᐃᔭᐅᔾᔪᑎ ᐱᐅᔪᒃᑯᑦ ᐊᑦᑐᖅᓯᓂᖃᕐᓂᐊᖅᑐᖅ ᑐᒃᑐᐃᑦ ᑎᒥᖏᓐᓂᒃ, ᐊᓐᓇᐅᒪᐃᓐᓇᕈᓐᓇᕐᓂᖏᓐᓂᒃ ᐊᒻᒪ ᖃᓄᖅ ᐃᓄᐃᑦ ᐊᑐᖅᐸᓐᖏᓐᓂᒃ ᑐᒃᑐᐃᑦ ᐱᒋᐊᕈᑕᐅᓂᖓᓄᑦ ᑕᐅᖅᓰᖃᑦᑕᐅᑎᓂᕐᒥᒃ ᓱᓇᑐᐃᓐᓇᕐᓂᒃ ᖃᐅᔨᓴᕐᓂᒃᑯᑦ ᖃᐅᔨᒪᔭᓂᒃ ᐊᒻᒪ ᖃᐅᔨᒪᔭᑐᖃᕐᓂᒃ, ᐊᒻᒪᓗᑦᑕᐅᖅ ᐊᔾᔨᒌᒃᓴᐃᓐᓇᕐᓂᒃ ᑐᑭᓯᐅᒪᓕᕈᑕᐅᓪᓗᓂ ᑕᐃᒎᓯᕐᓂᒃ ᐊᒻᒪ ᑎᒥᖏᓐᓂᒃ," ᐅᖃᓚᐅᖅᑐᖅ ᐳᕈᒃ. "ᑕᐃᒃᓱᒪᓂᑲᓪᓚᓪᓕ, ᐊᔾᔨᒌᓐᖏᓐᓃᑦ ᐅᖃᐅᓰᑦ ᐊᒻᒪ ᑐᑭᓯᐅᒪᓂᐅᑉ ᐱᒡᒐᓇᕈᑕᐅᕙᓚᐅᖅᓯᒪᒻᒪᑕ ᐊᒥᖅᑲ?ᓱᐊᕐᓂᕐᒧᑦ ᑐᑭᓯᒋᐊᕈᑎᒃᓴᓂᒃ ᒥᒃᓵᓄᑦ ᓱᓇᐃᑦ ᐃᓚᖏᑦ ᑐᒃᑐᐃᑦ ᐱᒻᒪᕆᐅᑎᑕᐅᒻᒪᖔᑕ ᐅᕝᕙᓘᓐᓃᑦ ᐊᑐᖅᑕᐅᓲᖑᒻᒪᖔᑕ, ᖃᓄᖅ ᑕᐃᒃᑯᐊ ᐃᓚᖏᑦ ᐊᑐᖅᑕᐅᓲᖑᒻᒪᖔᑕ ᓂᕿᒋᔭᐅᓪᓗᑎᒃ, ᐃᓅᓕᓂᐅᑎᒋᔭᐅᓪᓗᑎᒃ, ᐊᓐᓄᕌᕆᔭᐅᓪᓗᑎᒃ ᐅᕝᕙᓘᓐᓃᑦ ᖃᐅᔨᓴᕈᑕᐅᓪᓗᑎᒃ."

ᓴᓇᓇᓱᓪᓗᓂ ᓇᓗᓇᐃᔭᐅᔾᔪᑎᒥᒃ, ᖃᐅᔨᓴᖃᑎᒌᑦ ᐱᖃᑕᐅᖃᑦᑕᓚᐅᖅᐳᑦ ᓴᓇᓇᓱᓪᓗᓂ ᓇᓗᓇᐃᔭᐅᔾᔪᑎᒥᒃ, ᖃᐅᔨᓴᖃᑎᒌᑦ ᐱᖃᑕᐅᖃᑦᑕᓚᐅᖅᐳᑦ ᓄᓇᓕᒻᒥᐅᓄᑦ ᑐᒃᑐᓕᐊᖅᑐᓄᑦ, ᓱᓇᑐᐃᓐᓇᕐᓂᒃ ᖃᐅᔨᓴᕐᓂᒃᑯᑦ ᐋᑦᑐᐃᕙᒃᓱᑎᒃ ᖃᐅᔨᓴᕐᕕᒻᒥ ᐊᒻᒪ ᐊᐱᖅᓱᖅᑐᑎᒃ ᐃᓄᑐᖃᓂᒃ ᐊᒻᒪᓗ ᐊᖑᓇᓱᒃᑎᓂᒃ. ᐃᓚᓕᐅᑎᔪᒥᒃ ᑐᒃᑐᓂᒃ ᓇᓗᓇᐃᔭᐅᔾᔪᑎᒧᑦ ᐅᖃᓕᒫᒐᕐᒧᑦ, ᓴᓇᕗᑦ ᐅᖃᓕᒫᒐᒥᒃ ᒍᕋᐃᑦ 10-ᒥ ᓄᓇᕗᒻᒥ ᐃᓕᓐᓂᐊᖅᑎᓄᑦ, ᓴᓇᓪᓗᑎᒃ ᐊᑭᓐᓇᕐᒥᐅᑕᓂᒃ ᐊᒻᒪᓗ ᐃᓐᑐᓂᐊᒃᑯᑦ ᑕᑯᔭᒃᓴᓂᒃ ᒪᑯᓂᖓᒐᓚᒃ ᐊᔾᔨᓕᐅᖅᓯᒪᔪᓂᒃ ᐋᑦᑐᖅᑐᓂᒃ.


Return to Table of Contents

ᐋᕐᓗᐃᑦ ᓅᑉᐸᓪᓕᐊᔪᑦ ᐅᑭᐅᖅᑕᖅᑐᒥ

ᐃᓅᓯᖅ ᐅᑭᐅᖅᑕᖅᑐᒥ ᐳᐃᔨᓄᑦ ᐊᓯᕈᖅᐸᓪᓕᐊᕗᖅ ᓱᑲᓐᓂᖅᓴᒥᒃ ᑭᒃᑯᑐᐃᓐᓇᕐᓄᑦ ᐃᓱᒪᒋᔭᐅᓯᒪᔪᒥᑦ, ᒪᓕᒃᑐᒍ ᑲᓇᑕᒧᑦ ᓯᕗᓕᐅᖅᑕᐅᔪᖅ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᐱᓕᕆᐊᖑᔪᖅ ᑕᐃᒍᖅᑕᐅᔪᖅ ᐃᒫᒃ ᓯᓚᕐᔪᐊᓕᒫᕐᒥ ᐅᖅᑰᓯᕙᓪᓕᐊᓂᖅ ᐊᒻᒪ ᐅᑭᐅᖅᑕᖅᑐᒥ ᐳᐃᔨᑦ.

ᑖᒃᓱᒪᓂ ᐱᓕᕆᐊᖑᔪᒥ ᓱᓇᑐᐃᓐᓇᕐᓂᒃ ᖃᐅᔨᓴᖅᑎᐅᖃᑎᒌᑦ, ᓯᕗᓕᖅᑎᖃᖅᑐᑎᒃ ᓘᑦᑖᕐᒥᒃ ᓯᑏᕕ ᕘᒐᓴᓐᒥᒃ ᐃᒪᕐᒥᐅᑕᓕᕆᔨᒃᑯᑦ ᑲᓇᑕᒥ ᐃᒥᓕᕆᕕᖓᓂᒥᐅᑕᕐᒥᒃ, ᑲᑐᔾᔨᖃᑎᖃᖅᐳᑦ ᐃᓄᓐᓂᒃ ᐃᓄᑐᖃᕐᓂᒃ ᐊᒻᒪ ᐊᖑᓇᓱᒃᑎᓂᒃ ᑕᓯᐅᔭᕐᔪᐊᖅᐸᓯᒻᒥ ᑐᕌᒐᖃᖅᑐᑎᒃ ᑐᑭᓯᐅᒪᓕᕋᓱᐊᕐᓂᕐᒥᒃ ᖃᓄᖅ ᓇᑦᑏᑦ, ᕿᓚᓗᒐᐃᑦ, ᐊᒻᒪ ᓇᓄᐃᑦ - ᓱᖏᐅᑦᑎᐊᕐᒪᖔᑕ ᓱᖏᐅᑎᓂᐊᓐᖏᒻᒪᑕᓘᓐᓃᑦ ᐊᑦᑐᖅᓯᓂᖏᓐᓄᑦ ᓯᓚᐅᑉ ᐊᓯᕈᕐᓂᖓᑕ. ᐃᓚᒋᔭᐅᕗᑦ ᐱᓕᕆᐊᖑᔪᒃᑯᑦ ᓴᖅᑭᖅᓯᒪᔪᓄᑦ ᑲᔪᓯᕙᓪᓕᐊᖏᓐᓇᖅᑐᖅ ᓄᓇᓕᒻᒦᑦᑐᒥᒃ ᖃᐅᔨᓴᖅᐸᓪᓕᐊᔾᔪᑎ.

ᐃᓚᖓᑦ ᓯᕗᓪᓕᖅᐹᑦ ᓂᕆᐅᓇᓐᖏᑦᑐᖅ ᑐᑭᓯᒋᐊᕈᑎᒃᓵᔾᔪᐃᑦ ᐅᑭᐅᖅᑕᖅᑐᒥᐅᑦ ᐅᓂᒃᑳᓕᐅᕈᑎᒋᓯᒪᔭᖏᑕ ᓱᓇᑐᐃᓐᓇᕐᓂᒃ ᖃᐅᔨᓴᖅᑎᓄᑦ ᐋᕐᓗᐃᑦ ᐊᒥᓱᕈᖅᐹᓕᕐᓂᖏᑦ. ᐋᕐᓗᐃᑦ ᓱᖏᐅᔾᔨᔪᓐᓇᑎᐊᓐᖏᒻᒪᑕ ᓯᑯᓂᒃ. ᐋᓐᓂᕈᑎᒋᔪᓐᓇᖅᑐᒋᑦ ᐊᖏᔪᑦ ᓇᐸᕈᑕᖏᑕ, ᐊᒻᒪ ᐱᓕᓂᐅᓲᖑᓇᑎᒃ ᐊᔪᓕᑦᑕᐃᓕᓇᓱᐊᕐᓂᕐᒥᒃ ᐊᓪᓗᖃᓐᖏᑦᑐᒥ.

ᑭᓯᐊᓂ, ᓯᑯᑦ ᐊᑲᐅᓐᖏᓕᐅᕈᑕᐅᔪᓐᓃᐸᓪᓕᐊᑐᐃᓐᓇᖅᑐᑦ ᐅᑭᐅᖅᑕᖅᑐᒥ. ᖃᑦᑏᓐᓇᕈᓗᐃᑦ ᐅᑭᐅᑦ ᓯᕗᓂᖓᓂ, ᓱᓇᑐᐃᓐᓇᕐᓂᒃ ᖃᐅᔨᓴᖅᑎᑦ ᓇᓚᐅᑦᑖᖃᑦᑕᓚᐅᖅᓯᒪᕗᑦ ᐅᑭᐅᖅᑕᖅᑐᖅ ᓯᑯᖃᖃᑦᑕᕈᓐᓃᕈᓐᓇᕐᓂᕋᖅᑐᒍ ᐊᐅᔭᒃᑯᑦ ᐃᓗᐊᓐᓂ ᓯᓐᑐᕆᐅᑉ. ᑭᓯᐊᓂ ᐊᓯᕈᖅᑐᖃᖅᐸᓪᓕᐊᕗᖅ ᓱᑲᑦᑐᒥᒃ, ᐊᒻᒪ ᕘᒐᓴᓐ ᐅᖃᓚᐅᖅᐳᖅ ᑕᐃᒃᑯᐊ ᒫᓐᓇ ᐃᓚᖏᑦ ᓇᓚᐅᑦᑖᖅᐸᓕᕆᕗᑦ ᓯᑯᖃᖃᑦᑕᕈᓐᓃᑐᐃᓐᓇᕆᐊᖃᖅᑐᒋᔭᐅᓪᓗᓂ ᐊᐅᔭᒃᑯᑦ ᑕᓪᓕᒪᐃᓐᓇᕐᓂ ᐅᑭᐅᓂ.

ᑕᐃᒫᒃ ᐅᐸᒍᒥᓇᕆᔭᐅᓕᕈᓐᓇᖅᑐᖅ ᐋᕐᓗᓐᓄᑦ, ᑭᓯᐊᓂ ᐃᓅᓯᖏᓐᓄᑦ ᐱᒡᒐᓇᓕᕈᑕᐅᒐᓗᐊᖅᑐᓂ ᓯᑯᒥᐅᑕᕐᓄᑦ ᓂᕿᑐᓲᓄᑦ ᒪᑯᓄᖓ ᓇᓄᐃᑦ ᐊᒻᒪ ᐃᓄᐃᑦ ᐊᖑᓇᓱᒃᑎᑦ. ᑕᓯᐅᔭᕐᔪᐊᕐᒥ ᐃᒪᕐᒥᐅᑕᐃᑦ ᐆᒪᔪᑦ ᓄᖅᑭᐅᕐᕕᖏᑦ ᐊᓯᕈᖅᐸᓪᓕᐊᑐᐃᓐᓇᕆᐊᖃᖅᐳᑦ, ᕘᒐᓴᓐ ᐅᖃᓚᐅᖅᐳᖅ, ᓇᓄᕐᓄᑦ ᓇᑦᑎᓄᓪᓗ ᓈᒻᒪᓛᖑᓪᓗᓂ ᐃᓄᐃᑦ ᐊᖑᓇᓱᒃᑎᑦ ᖁᓪᓕᐅᓪᓗᑎᒃ ᓈᒻᒪᓛᖑᓕᕐᓗᓂ ᕿᓚᓗᒐᕐᓄᑦ, ᐋᕐᓗᐃᑦ ᖁᓪᓕᐅᓕᕐᓗᑎᒃ - ᑕᒪᓐᓇ ᐊᓯᔾᔨᕐᓂᖅ ᐱᕕᔾᔪᐊᒃᑯᑦ ᖃᓄᐃᒍᑕᐅᓕᕈᓐᓇᖅᑐᖅ ᐃᓄᐃᑦ ᓂᕆᔾᔪᓯᑐᖃᖏᓐᓄᑦ ᐊᒻᒪ ᐃᓕᖅᑯᓯᖓᓐᓄᑦ.


Return to Table of Contents






ᐃᓕᓐᓂᐊᕐᓂᖅ, ᑐᓴᐅᒪᖃᑦᑕᐅᑎᓂᖅ ᐊᒻᒪᓗ ᓯᓚᑎᒥᐅᓂᒃ ᐃᑲᔪᕐᓂᖅ

ᐃᓕᓐᓂᐊᖅᑎᑦ ᑕᑯᓇᑉᐳᑦᕿᑭᖅᑖᓗᒻᒥᒃ ᐅᒥᐊᕐᔪᐊᒃᑯᑦ

ᐋᒡᒌᓯ 2010-ᒥ, 77 ᐃᓕᓐᓂᐊᖅᑎᑦ ᐊᒻᒪ 45 ᓱᓇᑐᐃᓐᓇᕐᓂᒃ ᖃᐅᔨᓴᖅᑎᑦ, ᐃᓕᓐᓂᐊᖅᑎᑦᑎᔨᑦ, ᓴᓇᐅᒐᓕᐅᖅᑎᑦ ᐊᒻᒪ ᐅᖃᐅᔾᔪᐃᔨᑦ ᐃᓕᓐᓂᐊᖅᑎᓂᒃ ᓯᑯᒨᖃᑎᖃᓚᐅᖅᐳᑦ, ᐅᑭᐅᖅᑕᖅᑐᒃᑯᑦ ᐊᐅᓪᓚᕐᓂᕐᒥ ᐃᑭᒪᓪᓗᑎᒃ ᐴᓗ ᐊᒻᐹᓴᑐᒧᑦ ᐅᐊᓐᓇᖅᐸᓯᐊᒍᑦ ᓄᓇᕕᐅᑉ ᐊᒻᒪ ᓂᒋᖅᐸᓯᐊᒍᑦ ᕿᑭᖅᑖᓘᑉ. ᐊᑕᐅᓰᑦ ᐱᖓᓱᐃᓂ ᐃᓚᖏᑦ ᐃᓕᓐᓂᐊᖅᑎᑦ ᓄᓇᖃᖅᑳᖅᓯᒪᔫᓚᐅᖅᑐᑦ ᐃᓅᓱᒃᑐᑦ, ᐃᓚᖏᑦ ᓄᓇᓕᓐᓃᖔᖅᑐᑦ ᑐᓐᖓᓱᑦᑎᑦᑎᔨᐅᓚᐅᖅᑐᑦ ᐅᒥᐊᕐᔪᐊᒥ ᒪᕐᕉᒃ ᐱᓇᓱᐊᕈᓰᓐᓂᒃ ᐳᓚᕋᒍᑕᐅᑎᓪᓗᒍ.

ᑕᐃᓐᓇ ᑕᑕᖅᑐᖅ ᖃᐅᔨᓴᕐᓂᖅ ᐊᒻᒪ ᐃᓕᓐᓂᐊᕈᑎ ᐃᓚᖃᓚᐅᖅᑐᖅ ᒪᑯᓂᖓ ᓄᓇᓕᓐᓄᑦ ᓂᐅᕐᕈᑲᑕᓐᓂᖅᒃ, ᓯᔾᔭᒧᑦ ᑐᓚᖃᑦᑕᓂᖅ, ᐃᓕᓐᓂᐊᕐᓃᑦ, ᖃᐅᔨᓴᕐᓂᖅ, ᐊᒥᓱᒃᑲᓂᕐᓂᓪᓗ. ᐱᓕᕆᓪᓚᑖᕐᓇᖅᑐᓂᒃ ᐃᓕᓐᓂᐊᕈᑎᒃᓴᖃᕐᓂᖓ ᐊᒻᒪ ᓄᑖᓂᒃ ᐱᖃᑎᑖᕐᕕᒃᓴᖃᕐᓂᖓ ᐃᓅᓯᓕᒫᖅ ᐃᖅᑲᐅᒪᔭᐅᔾᔪᑎᒋᔪᓐᓇᓚᐅᖅᑕᖓ ᐃᓕᓐᓂᐊᖅᑎᓄᑦ. ᐱᔪᒥᓇᕈᑎᖏᑦ ᐃᓚᖃᓚᐅᖅᑐᑦ ᒪᑯᓂᖓ ᓄᓇᕕᒻᒥ ᖃᐅᔨᓴᕐᕕᒃ ᑰᔾᔪᐊᕐᒥ, ᑭᓐᖓᐃᑦ, ᐸᓐᓂᖅᑑᖅ, ᐊᐅᔪᐃᑦᑐᖅ ᑲᓇᑕᐅᑉ ᒥᕐᖑᐃᓯᕐᕕᖓ, ᐊᒻᒪ ᑕᑯᖃᑦᑕᕐᓂᖅ ᒪᑯᓂᖓ ᑎᒻᒥᐊᑦ ᐃᒫᓅᓲᑦ, ᐊᐃᕖᑦ, ᓇᓄᐃᑦ ᐊᒻᒪ ᐊᕐᕖᑦ.


Return to Table of Contents






ᐃᓄᐃᓪᓗ ᓄᓇᓖᓪᓗ

ᓄᓇᓐᖑᐊᓕᐅᕐᓂᖅ ᐃᓄᐃᑦ ᐊᑐᕈᓯᖓᓐᓂᒃ ᓯᑯᒥᒃ

ᓯᑯ ᐱᒻᒪᕆᐅᓪᓗᓂ ᖃᓄᐃᑦᑑᔾᔪᓯᕆᕚ ᐅᑭᐅᖅᑕᖅᑑᑉ ᐊᕙᑎᖓᑕ. ᐊᕐᕌᒍᓕᒫᑲᓴᒃ ᐅᑭᐅᖅᑕᖅᑐᒥ ᓄᓇᓖᑦ ᓇᔪᐃᓲᖑᕗᑦ ᓯᑯᒥᒃ ᒪᑯᓄᖓ ᐊᐅᓪᓚᕐᓂᖅ, ᐊᖑᓇᓱᓐᓂᖅ ᐊᒻᒪ ᐃᕿᐊᓐᖑᐃᔭᕐᓂᖅ. ᓱᓕ ᑕᒪᐃᑕᑲᓴᒃ ᓄᓇᓐᖑᐊᑦ ᑕᑯᒃᓴᐅᔪᖃᓲᖑᕗᑦ ᓄᓇᐅᑉ ᖃᓄᐃᑦᑑᔾᔪᓯᖏᓐᓂᒃ, ᐊᒻᒪ ᐃᒪᐃᑦ ᐃᓕᔭᐅᓲᖑᓇᑎᒃ ᑕᑯᒃᓴᐅᔪᖃᕋᓂ ᖃᓄᐃᓕᕐᓂᖓᓂᒃ ᐊᒻᒪ ᖃᓄᐃᑦᑑᓂᖓᓂᒃ ᓯᑰᑉ, ᑕᒪᒃᑯᐊ ᐊᒃᓱᐊᓗᒃ ᐱᒻᒪᕆᐅᒐᓗᐊᖅᑎᓪᓗᒋᑦ ᐃᓄᓐᓄᑦ. ᐊᒻᒪᑦᑕᐅᖅ, ᒫᓐᓇᒫᒃᑯᑦ ᐅᑭᐅᖃᑦᑕᖅᓯᒪᔪᓂ ᐃᓄᐃᑦ ᐊᒻᒪ ᓱᓇᑐᐃᓐᓇᕐᓂᒃ ᖃᐅᔨᓴᖅᑎᑦ ᓲᔪᖅᓴᖃᑦᑕᓕᖅᓯᒪᕗᑦ ᐊᓯᕈᖅᑐᓂᒃ ᐅᑭᐅᖅᑕᖅᑑᑉ ᓯᑯᖓᓂ ᐊᑦᑐᐊᔪᓂᒃ ᐊᓯᕈᕐᓂᖓᓄᑦ ᓯᓚᐅᑉ. ᐱᓕᕆᖃᑎᖃᖅᑐᑎᒃ ᐊᑕᐅᓰᖑᓐᖏᑦᑐᓂᒃ ᐃᓄᐃᑦ ᓄᓇᓕᖏᓐᓂᒃ ᐊᒻᒪ ᑐᓐᖓᕕᖃᖅᑐᑎᒃ ᓯᕗᓂᖓᓂ ᓯᑯᒥᒃ ᖃᐅᔨᓴᕐᓂᐅᖃᑦᑕᖅᓯᒪᔪᓂᒃ ᓄᓇᕗᒻᒥ ᐊᒻᒪ ᓄᓇᕕᒻᒥ, ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᖃᐅᔨᓴᖅᑎᑦ ᑎᑎᖅᑲᓕᐅᕈᑎᖃᖅᓯᒪᕗᑦ ᐊᒻᒪ ᓄᓇᓐᖑᐊᓕᐅᖅᑐᑎᒃ ᐃᓄᐃᑦ ᐊᑐᕈᓯᖓᓐᓂᒃ ᓯᑯᒥᒃ ᐊᒻᒪ ᓱᓇᑐᐃᓐᓇᕐᓂᒃ ᖃᐅᔨᒪᔭᖏᓐᓂᒃ ᒥᒃᓵᓄᑦ ᓯᑰᑉ.

"ᓄᓇᓐᖑᐊᓕᐅᓚᐅᖅᑕᕗᑦ ᖃᓄᐃᑦᑑᔾᔪᓯᖓ (ᑖᓐᓇ ᓇᓗᓇᐃᔭᖅᓯᒪᑦᑎᐊᖅᑐᖅ ᓇᓗᓇᐃᖅᑕᐅᔾᔪᑎ ᓄᓇᒥᒃ ᐅᕝᕙᓘᓐᓃᑦ ᐊᓯᐊᓂᒃ) ᓯᑰᑉ ᐃᓄᐃᑦ ᐊᖑᓇᓱᒃᑎᑦ ᖃᐅᔨᒪᔭᖓᑦ, ᒪᑯᐊᒐᓚᐃᑦ ᖁᓪᓗᕐᓃᑦ, ᓇᒡᒍᐃᑦ, ᐊᐅᒃᑲᓃᑦ, ᑯᒃᓴᓇᕆᔭᐅᔪᑦ, ᐊᑦᑕᓇᕐᓂᖏᓐᓄᑦ ᐃᓱᒫᓗᓇᕆᔭᐅᔪᑦ," ᐅᖃᓚᐅᖅᑐᖅ ᑳᓪᑕᓐ ᐃᓕᓐᓂᐊᕕᔾᔪᐊᕐᒥ ᖃᐅᔨᓴᖅᑎ ᑲᓛᑎᐅ ᐊᐳᐊᑕ, ᑖᓐᓇ ᐱᓕᕆᐊᖑᔪᒧᑦ ᓯᕗᓕᖅᑎᐅᓚᐅᖅᑐᖅ ᖃᐅᔨᓴᕐᓂᕐᒥ. "ᓯᑯᒨᖃᑎᖃᓚᐅᖅᑐᒍᑦ ᖃᐅᔨᒪᑦᑎᐊᖅᑐᓂᒃ ᐊᖑᓇᓱᒃᑎᓂᒃ ᐊᒻᒪ ᐊᐱᖅᓱᖅᐸᑦᑐᑕ. ᓇᑦᓴᖅᓯᒪᓚᐅᖅᑐᒍᑦ ᑕᒻᒪᕇᒃᑯᑎᓂᒃ ᐊᒻᒪ ᓄᓇᓐᖑᐊᓕᐅᖅᑐᒋᑦ ᐱᒻᒪᕇᑦ ᖃᓄᐃᑦᑑᔾᔪᓯᖏᑦ."

"ᑲᑎᖃᑦᑕᓚᐅᕆᕗᒍᑦᑕᐅᖅ ᓄᓇᓐᖑᐊᓕᐅᖅᑐᑕ – ᖃᐃᑎᑦᑎᖃᑦᑕᓚᐅᖅᑐᒍᑦ ᐃᓄᓐᓂᒃ ᐊᒻᒪ ᓄᓇᓐᖑᐊᓂᒃ ᓵᒦᑎᑦᑎᓪᓗᑕ ᐊᒻᒪᓗ ᐅᖃᐅᔾᔨᖁᕙᑦᑎᑐᒍ ᐅᕙᑦᑎᓐᓂᒃ ᖃᐅᔨᒪᔭᖏᓐᓂᒃ ᒥᒃᓵᓄᑦ ᓯᑰᑉ," ᐅᖃᕆᐊᒃᑲᓂᖅᐳᖅ. "ᐃᓄᓐᓂᒃ ᖃᐅᔨᓴᖅᑎᖃᓚᐅᖅᑐᒍᑦ ᐊᑐᓂᑦ ᓄᓇᓕᓐᓂ ᓄᐊᑦᑎᖃᑕᐅᓚᐅᖅᑐᓂᒃ ᑲᑎᖅᓱᒐᕐᓂᒃ." ᐱᖃᑕᐅᔪᑦ ᓄᓇᕗᒻᒥ ᓄᓇᓖᑦ ᐅᑯᐊᖑᓚᐅᖅᐳᑦ ᑭᓐᖓᐃᑦ, ᑲᖏᖅᑐᒑᐱᒃ, ᐃᒡᓗᓕᒃ ᐊᒻᒪ ᐸᓐᓂᖅᑑᖅ.

ᖃᐅᔨᓴᖅᑎᑦ ᓄᐊᑦᑎᓚᐅᖅᐳᑦ ᐊᔾᔨᒌᓐᖏᑦᑐᓂᒃ ᑐᑭᓯᒋᐊᕈᑎᒃᓴᓂᒃ ᒥᒃᓵᓄᑦ ᓯᑰᑉ ᒪᑯᓂᖓᒐᓚᒃ ᐊᕐᕌᒎᑉ ᐃᓚᖓᓂ ᖃᓄᐃᑦᑑᓂᕆᓲᖏᑦ, ᐊᑐᖅᑕᐅᓂᕆᓲᖏᑦ, ᓯᑯᒥ ᐅᓗᕆᐊᓇᖅᑐᑦ, ᐊᖑᓇᓱᕝᕕᐅᓲᑦ, ᐊᖅᑯᑎᑦ, ᓄᓇᐃᑦ ᐊᑎᖏᑦ ᐊᒻᒪ ᐊᓯᕈᕐᓂᖏᑦ ᐊᑐᖅᑕᐅᔾᔪᓯᖏᑕ ᑕᐃᒪᐃᑎᑕᐅᔪᑦ ᐃᓅᓯᐅᑉ ᐅᕝᕙᓘᓐᓃᑦ ᓯᓚᐅᑉ ᐊᓯᕈᕐᓂᖓᓄᑦ. ᓴᓇᓚᐅᕆᕗᑦᑕᐅᖅ ᓄᑖᓂᒃ ᐱᓕᕆᔾᔪᑎᓂᒃ ᓴᓇᓯᒪᔪᓂᒃ ᓄᓇᓐᖑᐊᓕᐅᕈᑎᒃᓴᓂᒃ ᐊᒻᒪ ᖃᐅᔨᓴᖅᐸᓪᓕᐊᔾᔪᑎᒃᓴᓂᒃ ᓯᑰᑉ ᐊᕙᑎᖓᓂᒃ. ᐆᑦᑑᑎᒋᓗᒍ, ᓄᓇᓐᖑᐊᓕᐅᕐᓂᕐᒧᑦ ᓴᓇᔭᐅᔪᒃᓴᓂᒃ ᑎᑎᕋᐅᔭᖅᑎᑦ ᐃᓕᓐᓂᐊᕕᔾᔪᐊᖓᓂᑦ ᑳᓪᒋᐅᕆ ᐱᓕᕆᖃᑎᖃᓚᐅᖅᐳᑦ ᐃᓄᓐᓂᒃ ᐊᖑᓇᓱᒃᑎᓂᒃ ᑲᖏᖅᑐᒑᐱᖕᒥ ᓴᓇᓇᓱᐊᖅᑐᑎᒃ ᓄᑖᓂᒃ ᓯᑭᑑᒧᑦ ᐋᖅᑭᑕᖅᑐᓂᒃ ᑕᒻᒪᕇᒃᑯᑎᓂᒃ.

"ᐊᒃᓱᐊᓗᒃ ᐃᓱᒪᒋᕙᕗᑦ ᕿᒪᐃᓂᖅ ᑲᑎᖅᓱᒐᕐᓂᒃ ᐊᒻᒪ ᖃᐅᔨᓴᕐᓂᖅᐳᑦ ᐊᑐᐃᓐᓇᐅᑎᒍᒪᓪᓗᒍ ᐊᒻᒪ ᐊᑑᑎᖃᖁᓪᓗᒍ ᓄᓇᓕᒻᒧᑦ," ᐅᖃᓚᐅᖅᑐᖅ ᐊᐳᐊᑕ. "ᓄᓇᓕᕆᓂᕐᒥᑦ ᑲᑎᖅᓱᒐᐃᑦ, ᓂᐱᓕᐅᖅᑕᐅᓯᒪᔪᑦ ᐃᓄᑐᖃᐃᑦ, ᑕᕐᕆᔮᑦ, ᐊᔾᔨᓐᖑᐊᑦ, ᓂᐱᓕᐅᖅᓯᒪᔪᑦ ᐊᒻᒪ ᑎᑎᕋᖅᓯᒪᔪᖅᑦ ᓄᓇᓐᖑᐊᒨᖅᑲᖅᑕᐅᓚᐅᖅᐳᑦ. ᐱᒻᒪᕆᐅᓕᕈᓐᓇᖅᑐᖅ ᐃᓕᓐᓂᐊᖅᑎᑦᑎᔾᔪᑕᐅᓗᓂ." ᐊᑐᓂᑦ ᓄᓇᓖᑦ ᐃᓚᐅᓚᐅᖅᐳᑦ ᐃᓱᒪᓕᐅᕐᓂᕐᒧᑦ ᖃᓄᐃᑦᑐᓂᒃ ᑐᑭᓯᒋᐊᕈᑎᒃᓴᓂᒃ ᐊᑐᐃᓐᓇᐅᖁᔨᒻᒪᖔᕐᒥᒃ ᑭᒃᑯᑐᐃᓐᓇᕐᓄᑦ ᐅᕝᕙᓘᓐᓃᑦ ᐊᑐᐃᓐᓇᐅᖁᔨᓐᖏᒻᒪᖔᕐᒥᒃ, ᒪᑯᓂᖓᒐᓚᒃ ᑭᓕᒍᓱᓐᓇᖅᑐᓂᒃ ᑐᑭᓯᒋᐊᕈᑎᒃᓴᓂᒃ ᒥᒃᓵᓄᑦ ᐆᒪᔪᑦ ᐃᓂᖏᑕ.

"ᐃᓄᐃᑦ ᑲᒪᓇᖅᑐᓂᒃ ᖃᐅᔨᒪᔭᓖᑦ ᒥᒃᓵᓄᑦ ᓯᑰᑉ. ᐊᖑᓇᓱᒃᑎᓄᑦ ᐅᖃᐅᔾᔭᐅᔪᓐᓇᖅᑐᑎᑦ ᑭᑉᐸᖅ ᓇᓕᐊᒃ ᓂᓚᐃᑦ ᐅᕝᕙᓘᓐᓃᑦ ᓇᓕᐊᒃ ᐱᖃᓗᔭᐃᑦ ᓇᑭᓐᖔᕐᓂᑰᒻᒪᖔᑕ, ᐊᓪᓛᑦ ᐱᒋᐊᖅᓯᒪᒐᓗᐊᖅᐸᑦ ᐃᑭᕋᓴᒻᒥᑦ 100-ᖑᓗᐊᖅᑐᓂᒃ ᑭᓚᒦᑕᓂᒃ ᐅᖓᓯᓐᓂᓕᒻᒥᑦ," ᐅᖃᓚᐅᖅᑐᖅ. "ᐊᒃᓱᐊᓗᒃ ᑐᑭᓯᐅᒪᑦᑎᐊᖅᑐᑦ ᓄᓇᒥᒃ ᐊᒻᒪ ᐊᕙᑎᒥᒃ, ᐊᒻᒪ ᑕᒪᓐᓇ ᐃᓚᒋᔭᐅᕗᖅ ᓱᓇᑐᐃᓐᓇᕐᓄᑦ ᐅᖃᐅᓯᕆᒋᐊᓪᓚᒐᓱᐊᖅᓯᒪᔭᑦᑎᓐᓄᑦ ᖃᐅᔨᓴᕐᓂᕐᒧᑦ ᐱᓕᕆᐊᕆᔭᑦᑎᓐᓂ."

ᐃᓐᑐᓂᐊᒃᑰᖅᑐᖅ ᐊᐅᓚᑕᒃᓴᐅᔪᖅ ᓄᓇᓐᖑᐊᖓ ᓯᑰᑉ ᐱᒻᒪᕆᐅᓛᖑᔪᖅ ᓴᖅᑭᓚᐅᖅᑐᖅ ᐃᓄᐃᑦ ᓯᑯᒥᒃ ᐊᑐᓲᕈᓯᖓᓐᓄᑦ ᐊᒻᒪ ᓇᔪᐃᔾᔪᓯᖓᓐᓄᑦ ᐱᓕᕆᐊᖑᔪᒥᑦ. Inuit Sea Ice Use and Occupancy project  .


Return to Table of Contents

ᓄᕕᖅᓵᒃᓴᖅ ᑕᐃᒪᓐᖓᑐᖃᓕᓴᖅ

ᐅᖓᑖᓂ ᐅᑭᐅᑦ ᖁᓕᑦ ᓯᕗᓂᖏᑕ, ᐃᑦᑕᕐᓂᓴᕐᓂᐊᖅᑎ ᐸᑐᕇᓴ ᓴᑐᓚᓐ ᑲᓇᑕᐅᑉ ᑕᑯᔭᒐᖃᕐᕕᖓᒥᐅᑕᖅ ᐃᓅᓯᕆᔭᐅᓯᒪᔪᓂᒃ ᑕᑯᓚᐅᖅᓯᒪᕗᖅ ᑕᑯᓕᒪᓇᓐᖏᑦᑐᒥᒃ ᐊᑯᕐᖓᓐᓂ ᐃᓚᖏᑕ ᐱᖁᑎᒥᓃᑦ ᑕᐅᓴᓂᒃ ᐅᑭᐅᓕᐅᑉ ᑐᓃᑦ ᓄᓇᓕᒥᓂᖓᓐᓂ ᐅᐊᓐᓇᖅᐸᓯᐊᓂ ᕿᑭᖅᑖᓘᑉ: ᒪᕐᕉᓐᓂᒃ ᖃᓪᓗᓈᑦᑎᐊᑦ ᓄᕕᖅᓵᒃᓴᒥᓂᖏᓐᓂᒃ. ᑕᐃᒃᑯᐊ ᓄᕕᖅᓵᒃᓵᒃ, ᓄᕕᖅᓵᒃᓴᓕᐊᕆᓯᒪᔫᑉ ᒥᖅᑯᖏᓐᓂᑦ ᐅᑲᓕᐅᑉ, ᓯᕗᓪᓕᖅᐹᖑᓪᓗᑎᒃ ᖃᐅᔨᒪᓇᕈᑎᐅᓚᐅᖅᓯᒪᕗᒃ ᐃᓄᖏᑦ ᐅᐊᓐᓇᖅᐸᓯᐊᑕ ᓄᐊᑦ ᐊᒥᐅᕆᑲᐅᑉ ᐊᑯᓂᐅᓂᖅᓴᒻᒪᕆᒃ ᑲᑎᓯᓯᒪᔪᑐᖃᐅᓯᒪᓂᖏᓐᓂᒃ ᓯᓚᕐᔪᐊᕐᒥᐅᓂᒃ ᐃᓱᒪᒋᔭᐅᓯᒪᔪᒥᑦ.

"ᑕᒪᓐᓇ ᐅᑭᐅᖅᑕᖅᑐᖅ ᐃᓱᒪᒋᔭᐅᓲᑐᖃᐅᒻᒪᑦ ᐊᒃᓱᐊᓗᒃ ᐱᑕᑭᑦᑐᒋᔭᐅᓪᓗᓂ ᐊᒻᒪ ᐅᖓᓯᑦᑐᒋᔭᐅᓪᓗᓂ, ᑕᒪᓐᓇ ᐃᓚᖓ ᓯᓚᕐᔪᐊᑉ ᐅᐸᑦᑕᐅᖃᑦᑕᓕᕐᓂᑰᓱᒋᔭᐅᓪᓗᓂ ᖃᓪᓗᓈᑦ ᓄᓇᖓᓐᓂᒥᐅᑕᓄᑦ ᒫᓐᓇᒫᒃᑯᐃᓐᓇᖅ," ᓴᑐᓚᓐ ᐅᖃᓚᐅᖅᐳᖅ. ᐃᑦᑕᕐᓂᓴᕐᓂᐊᖅᑎᑦ ᐊᒻᒪ ᐱᔾᔪᓯᐅᓯᒪᔪᓕᕆᔨᑦ ᐃᓱᒪᖃᑦᑕᖅᓯᒪᒻᒪᑕ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᑦ ᐃᓅᖃᑎᒌᑦ ᐱᕙᓪᓕᐊᔪᒥᓂᐅᓱᒋᓪᓗᒋᑦ ᐃᓛᒃᑰᖅᑐᑎᒃ, ᐊᒻᒪ ᐊᕙᑎᐅᑉ ᐊᓯᕈᕐᓂᖓ ᐱᒻᒪᕆᐅᓛᖑᓪᓗᓂ ᐊᓯᕈᕈᑕᐅᓯᒪᓱᒋᓪᓗᒍ ᐃᓄᐃᑦ ᐃᓅᓯᖓᓐᓄᑦ.

ᑭᓯᐊᓂ, ᓴᑐᓚᓐ ᓇᓂᓯᖃᑦᑕᖅᓯᒪᒻᒪᑦ ᐊᒥᓱᕈᖅᐸᓪᓕᐊᑐᐃᓇᖅᑐᓂᒃ ᓇᓗᓇᓐᖏᔾᔪᑎᓂᒃ ᑲᑎᖃᑦᑕᖅᓯᒪᓂᖏᓐᓄᑦ ᐊᒻᒪ ᓂᐅᕐᕈᑎᖃᖃᑏᖃᑦᑕᖅᑐᒥᓂᐅᓂᖏᓐᓄᑦ ᑐᓃᑦ ᐊᒻᒪ ᐃᓄᐃᑦ ᐊᒻᒪ ᖃᓪᓗᓈᑦᑎᐊᑦ ᓄᓇᑖᕐᓂᑯᑦ ᐊᑯᑭᑦᑐᓂ ᓯᕗᓂᖓᓂ ᐊᑕᐅᓰᓐᖏᑦᑐᑦ ᓯᓐᑐᕆᑦ. ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓ ᓴᑐᓚᐅᑉ ᐱᓇᓱᐊᕋᑦᓴᖃᐅᑎᒋᓚᐅᖅᐹ ᐃᓚᒋᐊᖅᓯᓂᕐᒧᑦ ᖃᐅᔨᒪᔭᓂᒃ, ᑕᒪᐅᔪᑎᒍᑦ ᐱᓕᕆᔨᐅᔾᔪᓯᒃᑯᑦ ᐱᓕᕆᐊᖑᔪᒃᑯᑦ ᑕᐃᒍᖅᑕᐅᔪᒃᑯᑦ ᐃᒫᒃ ᐃᓄᓐᓄᑦ ᐱᔾᔪᓯᐅᓯᒪᔪᑦ: ᓯᓚᐅᑉ ᐊᓯᕈᕐᓂᖓ ᐊᒻᒪ ᑕᐃᒪᓐᖓᑐᖃᓂᑦ ᑲᑎᖃᑦᑕᕐᓂᑯᒥᓃᑦ ᐅᑭᐅᖅᑕᖅᑐᖓᓂ ᑲᓇᑕᐅᑉ, 1000–1900.

ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ, ᓴᑐᓚᓐ ᐊᒻᒪ ᐃᑦᑕᕐᓂᓴᕐᓂᐊᕐᓂᕐᒥ ᐱᓕᕆᔨᖏᑦ ᕿᒥᕐᕈᔪᒥᓂᐅᕗᑦ ᐱᑐᖄᓗᐃᑦ ᐅᑭᐅᖅᑕᖅᑐᒥ ᓄᓇᓕᒥᓃᑦ ᐋᖅᑭᓱᐃᓕᖅᑭᒐᓱᐊᖅᓱᑎᒃ ᐃᓄᓐᓄᑦ ᐱᔾᔪᓯᐅᓯᒪᔪᓂᒃ 1000-ᒥᒐᓚᒃ 1500-ᒧᑦ. ᑕᐃᒃᓱᒪᓂᑦᓴᐃᓐᓇᖅ, ᐱᓕᕆᖃᑎᒋᔭᐅᔪᖅ ᒥᐅᕆᐊᒻ ᑕᒡᓚᔅ ᐃᓕᓐᓂᐊᕕᔾᔪᐊᖓᓂᒥᐅᑕᖅ ᐋᓪᕘᑕᐅᑉ ᐊᒻᒪ ᔮᓐ ᓯᒨᓪ ᑯᐃᑉ ᐃᓕᓐᓂᐊᕕᔾᔪᐊᖓᓂᒥᐅᑖᒃ ᖃᐅᔨᓴᖅᑐᒥᓂᐅᕗᒃ ᒪᕐᕋᕐᒥᒃ ᑕᓯᕐᓗᓐᓂ ᖃᓂᒋᔭᖏᓐᓃᑦᑐᓂᒃ ᓄᓇᓕᒥᓃᑦ, ᕿᓂᖅᑐᑎᒃ ᖃᐅᔨᒪᓇᕈᑎᓂᒃ ᑕᐃᒃᓱᒪᓂ ᐊᕙᑎᒥᓂᖓᓄᑦ ᐊᒻᒪ ᓯᓚᖓᓄᑦ, ᐊᒻᒪ ᐱᔾᔪᓯᐅᓯᒪᔪᓕᕆᔨᑦ ᕿᒥᕐᕈᔪᒥᓂᐅᓪᓗᑎᒃ ᑕᒪᒃᑮᒃ ᔨᐅᕋᑉᒥ ᐊᒻᓚ ᑲᓇᑕᒥ ᐱᔾᔪᓯᐅᓯᒪᔪᓂᒃ ᑎᑎᕋᖅᑕᐅᓯᒪᔪᓂᒃ ᐊᒻᒪ ᐃᓄᐃᑦ ᐅᓂᒃᑲᐅᓯᖏᓐᓂᒃ ᐱᔾᔪᓯᐅᓯᒪᔪᓄᒃ ᑲᑎᑎᕆᓇᓱᒃᑐᑎᒃ ᐅᓂᒃᑳᓂᒃ ᐊᑦᑐᐊᖃᑦᑕᖅᑐᒥᓂᐅᓂᖏᓐᓂᒃ ᐃᓄᐃᑦ ᐊᒻᒪ ᔨᐅᕋᑉᒥᐅᑦ ᐃᓕᖅᑯᓯᖏᑕ 1500-ᓂᑦ 1900-ᓄᑦ.

ᐃᓚᒋᔭᐅᕗᑦ ᐱᖁᑎᒥᓃᑦ ᓴᑐᓚᓐ ᓇᓗᓇᐃᖅᓯᒪᔭᖏᓐᓄᑦ ᑕᑭᔫᑎᒐᓚᐃᑦ ᓄᕕᖅᓵᒃᓴᐃᑦ ᓴᓇᓯᒪᔪᑦ ᖃᓪᓗᓈᑦᑎᐊᑦ ᓴᓇᔾᔪᓯᖏᑎᑐᑦ, ᑕᐃᒃᑯᓄᖓ ᐱᒋᔭᐅᒐᔪᓲᒥᓃᑦ ᐃᓗᐃᒃᑲᐃᑦ ᓯᓪᓕᑎᑦ ᐊᑐᖅᑕᐅᓲᑦ ᐃᐱᒃᓴᐅᑕᐅᓪᓗᑎᒃ ᓴᕕᕋᔭᓐᓄᑦ ᓴᓇᕐᕈᑎᓄᑦ, ᐊᒻᒪ ᕿᔪᓪᓛᑦ ᓈᓴᐃᔾᔪᑏᑦ ᑕᐃᒃᑯᐊ ᐊᑐᖅᑕᐅᓲᑦ ᖃᓪᓗᓈᑦᑎᐊᓄᑦ ᓇᓗᓇᐃᒃᑯᑕᐅᓪᓗᑎᒃ ᓂᐅᕐᕈᑕᐅᔪᓄᑦ. ᑕᒪᒃᑯᐊ ᐱᑕᖃᐅᓪᓛᔪᑦ ᑕᐃᒃᓱᒪᓂᓕᓴᐃᑦ ᓂᐅᕐᕈᑕᐅᒐᔭᖅᑐᒥᓂᐅᔮᓐᖏᑦᑐᑦ, ᐅᖃᓚᐅᖅᑐᖅ. ᐊᑦᑕᑯᒥᓂᐅᔮᕐᓂᖅᓴᐃᓪᓕ ᓄᓇᓕᒥᓂᕐᒥᑦ.

"ᑕᐃᒃᓱᒪᓂᓕᓴᐃᑦ ᖃᓪᓗᓈᑦᑎᐊᑦ ᓯᔾᔭᓂ ᓄᓇᖃᓕᕐᓂᑯᒥᓂᐅᕙᖅᑲᐃ ᐅᑭᐅᖅᑕᖅᑐᖓᓂ ᑲᓇᑕᐅᑉ, ᐃᒻᒪᖃ ᑕᐅᓰᖃᑎᖃᕋᓱᐊᖅᑐᑎᒃ ᑐᓂᕐᓂᒃ? ᐊᐃᕕᕐᒧᑦ ᑑᒑᑦ, ᐊᓪᓚᓐᖑᐊᑦ ᑑᒑᖏᑦ, ᐊᐃᕕᕐᒧᑦ ᑲᐅᑦ, ᐊᒻᒪ ᓇᓄᕋᔭᐃᑦ ᐊᒃᓱᐊᓗᒃ ᐱᓪᓗᐊᑕᕆᔭᐅᕙᓐᓂᕐᒪᑕ ᖃᓪᓗᓈᑦᑎᐊᓄᑦ ᐊᑯᑭᑦᑐᕐᒥᐅᑕᓄᑦ ᓂᐅᕐᕈᑕᐅᕙᑦᑐᑎᒃ ᔨᐅᕋᑉᒧᑦ ᑕᐃᒃᓱᒪᓂ."

ᑖᓐᓇ ᐊᐱᖅᑯᑎ ᑭᐅᒻᒪᕆᒃᓯᒪᓐᖏᑦᑐᖅ ᓱᓕ, ᑭᓯᐊᓂ ᐃᓄᐃᑦ's ᓯᕗᕚᖏᑦ ᐊᖑᓇᓱᑦᑎᑐᐃᓐᓇᐅᓂᕐᒥᒃ ᐃᓕᖅᑯᓯᖃᖅᑐᒥᐅᓂᕙᓗᒃᑑᔮᓐᖏᑦᑐᑦ ᓱᕐᕋᑦᑎᑕᐅᕙᓪᓕᐊᔪᓐᓇᕐᓗᑎᒃ ᐊᕙᑎᐅᑉ ᐊᓯᕈᖅᐸᓪᓕᐊᓂᖓᓄᓗᐊᖅ.

"ᐃᓛᓪᓕ, ᒫᓐᓇ ᓂᐅᕐᕈᑎᖃᖃᑦᑕᖅᑐᒥᓂᐅᕙᓗᒃᑑᔮᖔᓕᖅᑐᑦ ᐃᓅᖃᑎᒌᑦ ᐃᓄᐃᑦ ᐅᖓᓯᑦᑐᒧᑦ ᐊᐅᓪᓚᖃᑦᑕᕈᓐᓇᖅᑐᑎᒃ, ᐱᖃᑕᐅᓇᓱᐊᖅᑐᑎᒃ ᓯᓚᕐᔪᐊᓕᒫᕐᒥ ᑮᓇᐅᔭᓕᐅᕈᑎᓄᑦ ᑕᐃᒃᓱᒪᓂ, ᐊᒻᒪ ᐱᓕᕆᖃᑎᒋᔭᐅᖏᓐᓇᓕᖅᓱᑎᒃ ᑕᒪᒃᑯᓄᖓ ᑮᓇᐅᔭᓕᐅᕈᑎᓄᑦ ᑕᐃᒪᓐᖓᓂᑦ," ᓴᑐᓚᓐ ᐅᖃᓚᐅᖅᐳᖅ.

ᑐᑭᓯᓂᖅ ᖃᓄᐃᑦᑐᓪᓚᕆᒥᓂᐅᓂᖓᓂᒃ ᑕᐃᒃᓱᒪᓂ ᐃᓄᐃᑦ ᐃᓕᖅᑯᓯᒥᓂᖓᑕ ᐱᒻᒪᕆᐅᕗᖅ, ᓴᑐᓚᓐ ᐅᖃᓚᐅᖅᐳᖅ: "ᑖᓐᓇ ᐱᓕᕆᐊᖑᔪᖅ ᒪᓕᒃᓯᒪᕗᖅ ᐃᓱᒪᒋᔭᐅᓯᒪᔪᒥᒃ ᑐᑭᓯᐅᒪᓂᖅ ᒫᓐᓇᒃᑯᑦ ᐅᓪᓗᒥ ᐅᑭᐅᖅᑕᖅᑐᒥ ᐃᓅᖃᑎᒌᓂᒃ ᐃᓕᓴᖅᓯᓂᖅᑕᖃᕆᐊᖃᕐᓂᖓᓂᒃ ᓯᕗᓂᖓᓂ ᐊᑦᑐᐃᓲᓂᖅᓴᐅᓯᒪᓂᖏᓐᓂᒃ, ᐊᖃᓄᖅᑑᖅᓯᒪᓂᖅᓴᐅᓪᓗᑎᓪᓗ ᐊᒻᒪ ᐊᑦᑐᐊᖃᑎᖃᕐᓂᖅᓴᐅᓪᓗᑎᒃ ᓯᕗᓂᖓᓂ ᑲᖐᒋᔭᐅᓯᒪᔪᖅ."


Return to Table of Contents

ᐃᓚᖏᑦ ᐅᖅᓱᐃᑦ ᐱᐅᓂᖅᓴᐅᕗᑦ ᐃᓚᖏᓐᓂᑦ

ᓂᕆᖃᑦᑕᕐᓂᖅ ᓂᕿᓂᒃ ᐃᓗᓯᑦᑎᐊᕆᒍᑎᒋᓂᐊᖅᑕᓐᓂᒃ ᐱᒡᒐᓇᓐᖏᓐᓇᓲᖑᓐᖏᒻᒪᑦ - ᐱᓗᐊᖅᑐᒥᒃ ᐅᑭᐅᖅᑕᖅᑐᒥ, ᑕᒫᓂ ᓇᓖᕌᕋᑦᓴᐃᑦ ᑭᓪᓕᖃᕐᓂᖏᓐᓄᑦ ᐊᒻᒪ, ᐊᑭᑐᒐᔪᑦᑐᑎᒃ. ᐊᑕᐅᓯᖅ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᐱᓕᕆᐊᖑᔪᖅ ᖃᐅᔨᒋᐊᒃᑲᓐᓂᕈᑕᐅᓚᐅᖅᐳᖅ ᐃᓚᖏᓐᓂᒃ ᓂᕿᑦ ᐊᑐᐃᓐᓇᐅᔪᑦ ᐃᓄᓐᓄᑦ ᑲᓇᑕᐅᑉ ᑲᓇᓐᓇᖅᐸᓯᐊᓂ ᐅᑭᐅᖅᑕᖅᑐᒥ ᐊᒻᒪ ᖃᓄᖅ ᐃᓄᐃᑦ ᓂᕈᐊᖅᐸᒻᒪᖔᑕ ᓂᕿᒥᓐᓂᒃ.

ᑕᐃᒃᑯᐊ ᓂᕿᑦ ᐱᔾᔪᑎᒋᔭᐅᔪᑦ ᑕᒪᒃᑯᐊᖑᕗᑦ ᐅᖅᓱᐃᑦ, ᑕᒪᒃᑮᓐᓂ ᓂᕿᒋᔭᐅᓲᑐᖃᕐᓂ ᐊᒻᒪ ᒫᓐᓇᓕᓴᕐᓂ. ᑕᐃᓐᓇ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᐱᓕᕆᐊᖑᔪᖅ ᑕᐃᒍᖅᑕᐅᕗᖅ ᐃᒫᒃ ᐅᖅᓱᖅ: ᐊᓯᕈᖅᐸᓪᓕᐊᓂᖏᑦ ᖃᓄᐃᑦᑑᓂᖏᑕ ᐅᑭᐅᖅᑕᖅᑐᒥ ᐅᖅᓱᐃᑦ ᐊᒻᒪ ᐃᓄᐃᑦ ᓂᕆᔾᔪᓯᖓᑦ. ᑕᐃᒪᓕ ᐊᑕᖏᔮᑦᑐᓂ ᐱᓕᕆᐊᖑᔪᒃᑯᑦ ᐱᓕᕆᓂᐅᔪᑦ ᑐᕌᖓᑎᑕᐅᓚᐅᕋᓗᐊᖅᑎᓪᓗᒋᑦ ᓇᓗᓇᐃᖅᓯᓇᓱᐊᕐᓂᕐᒧᑦ ᖃᓄᐃᑦᑐᑦ ᐅᖅᓱᐃᑦ ᐊᑐᐃᓐᓇᐅᒻᒪᖔᑕ ᐊᒻᒪ ᐊᑦᑐᖅᓯᓂᖏᓐᓄᑦ ᐃᓄᐃᑦ ᐃᓗᓯᖏᓐᓂᒃ, ᖃᐅᔨᓴᖅᑎᑦ - ᐊᒻᒪ ᐃᓄᖏᑦ ᒪᕐᕉᒃ ᐅᑭᐅᖅᑕᖅᑐᒥ ᓄᓇᓖᒃ - ᐊᒻᒪᑦᑕᐅᖅ ᑕᑯᓂᐊᓚᐅᕆᕗᑦ ᓱᓇᐃᑦ ᓱᕐᕋᐅᑎᓂᖃᖅᐸᒻᒪᖔᑕ ᓂᕿᓂᒃ ᓂᕈᐊᕐᓂᕐᓂᖅ.

ᐅᖅᓱᐃᑦ ᐱᒻᒪᕆᐅᔾᔪᑎᖃᖅᐳᑦ ᒪᕐᕉᓐᓂᒃ. ᐊᑕᐅᓯᖅ ᐃᓗᓯᕐᒧᑦ ᐃᓕᖓᓪᓗᓂ: ᑕᐃᒃᑯᐊ ᐅᖅᓱᐃᑦ ᐱᑕᖃᓲᑦ ᐃᖃᓗᓐᓂ ᐊᒻᒪ ᐳᐃᔨᓂ ᓴᐳᑎᔾᔪᑎᒋᔭᐅᓲᖑᒻᒪᑕ ᑎᒥᒥᒃ ᐆᒻᒪᑎᒧᑦ - ᐊᒻᒪ ᐊᐅᒻᒧᑦ ᐃᓕᖓᔪᓂᑦ ᐊᑲᐅᓐᖏᓕᐅᕈᑎᓂᑦ. ᐱᖃᑖ ᐱᒻᒪᕆᐅᔾᔪᑎᖓᑕ ᐊᑦᑐᐊᕗᖅ ᐊᕙᑎᒧᑦ: ᐊᒥᓱᑦ ᐃᓄᐃᑦ ᐅᖃᖃᑦᑕᖅᓯᒪᒻᒪᑕ ᑕᑯᖃᑦᑕᕐᓂᕋᖅᑐᑎᒃ ᐊᓯᕈᕐᓂᖏᓐᓂᒃ ᐅᖅᓱᖏᑕ ᐱᒻᒪᕆᐅᔪᑦ ᓄᓇᒥᐅᑕᐃᑦ ᓂᕿᒋᔭᐅᔪᑦ ᐆᒪᔪᑦ, ᐊᓯᕉᑎᖃᕆᓪᓗᓂᓗ ᐊᕙᑎᒥ.

ᑕᐃᒪ ᓯᕗᓪᓕᖅᐹᖅ ᓄᓇᓕᒃ ᖃᐅᔨᓴᕐᕕᐅᓚᐅᖅᑐᖅ ᓄᓇᓕᓐᓂ ᓂᕿᓂᒃ ᓇᓖᕌᕋᑦᓴᓂᒃ ᑕᐃᓐᓇ ᓇᐃᓂ, ᓄᓇᑦᓯᐊᕗᒥ. ᖃᐅᔨᓴᕐᓂᕐᒥ ᐱᓕᕆᔾᔪᓰᑦ ᐋᖅᑭᓱᖅᑕᐅᓚᐅᖅᑎᓪᓗᒋᑦ ᓇᐃᓂᒥ, ᑕᐃᓐᓇ ᖃᐅᔨᓴᕐᓂᖅ ᐱᓕᕆᐊᖑᓕᓚᐅᕆᕗᖅᑕᐅᖅ ᑲᖏᖅᑐᒑᐱᖕᒥ, ᓄᓇᕗᒻᒥ.

ᓯᕗᓪᓕᖅᐹᖅ ᐱᕙᓪᓕᐊᓂᖓ ᑕᒪᒃᑮᓐᓂ ᓄᓇᓖᓐᓂ ᐱᓕᕆᐊᖃᖅᑎᑦᑎᓂᐅᓚᐅᖅᑐᖅ ᐱᓇᓱᐊᖃᑎᒌᓂᒃ ᐱᓇᓱᐊᕈᑕᐅᔪᒥᒃ ᖃᐅᔨᒋᐊᕈᑕᐅᒋᐊᓐᖓᖅᑐᓂᒃ ᐃᓱᒪᒋᔭᖃᕈᓯᕐᓂᒃ ᐊᒻᒪ ᐃᓱᒫᓗᒍᑎᒋᔭᐅᔪᓂᒃ. ᑕᐃᒪᓗ ᓄᓇᓕᒻᒥ ᓈᓴᐃᔨᐅᖃᑎᒌᑦ ᐱᒋᐅᖅᓴᑎᑕᐅᓚᐅᖅᐳᑦ. ᑕᐃᒃᑯᐊ ᓈᓴᐃᔨᑦ ᐊᐱᖅᓱᖃᑦᑕᓚᐅᖅᑐᑦ ᒥᒃᓵᓄᑦ ᐃᓄᐃᑦ ᐃᓱᒪᒋᔭᖃᕈᓯᖏᑕ ᐱᓪᓗᒍ ᐅᖅᓱᖅ ᐊᒻᒪ ᓄᓇᒥᐅᑕᐃᑦ ᓂᕿᑦ, ᐊᒻᒪ ᒥᒃᓵᓄᑦ ᓱᓇᓂᒃ ᑕᑯᕙᒻᒪᖔᑕ ᓄᓇᒥ. ᑲᖏᖅᑐᒑᐱᖕᒥᑦ ᖃᐅᔨᔭᐅᔪᑦ ᓱᓕ ᕿᒥᕐᕈᐊᖅᑕᐅᕗᑦ, ᓇᐃᓂᒥᓪᓕ ᖃᐅᔨᔭᐅᔪᑦ ᐱᔭᐅᓯᒪᓕᖅᑐᑦ.

ᓇᐃᓂᒥ, ᑕᐃᒃᑯᐊ ᖃᐅᔨᓴᖅᑎᑦ ᖃᐅᔨᓚᐅᖅᑐᑦ 20 ᐳᓴᖏᑦ ᐃᓄᐃᑦ ᐊᐱᖅᓱᖅᑕᐅᔪᑦ ᐃᓱᒫᓗᒋᔭᖃᓚᐅᖅᑐᑦ ᐅᖅᓱᖃᖅᑎᒋᓂᖏᓐᓂᒃ ᓂᕆᕙᑦᑕᒥ, ᐱᓗᐊᖅᑐᒥᒃ ᐱᔾᔪᑎᖃᖅᑐᑎᒃ ᐊᑦᑐᐊᓂᖃᑐᐃᓐᓇᕆᐊᖃᕐᓂᖏᓐᓄᑦ ᖁᐃᑦᑎᐸᓪᓕᐊᓂᕐᒧᑦ, ᑕᖅᑐᕈᑎᕐᓗᓐᓂᕐᒧᑦ, ᐅᕝᕙᓘᓐᓃᑦ ᐆᒻᒪᑎᒃᑯᑦ ᐋᓐᓂᐊᖃᕐᓂᕐᒧᑦ. ᐊᓯᖏᑦ 45 ᐳᓴᖏᑦ ᐃᓱᒫᓗᒋᔭᖃᓚᐅᓐᖏᑎᐊᒻᒪᕆᑦᑐᓪᓕ ᓂᕆᕙᑦᑕᒥᓐᓂ ᐅᖅᓱᕐᓂᒃ.

ᐱᔾᔪᑎᒋᓪᓗᒋᓪᓕ ᓄᓇᒥᐅᑕᐃᑦ ᓂᕿᑦ, 83 ᐳᓴᖏᑦ ᐃᓱᒪᓚᐅᖅᑐᑦ ᓄᓇᒥᐅᑕᐃᑦ ᓂᕿᑦ ᐅᖅᓱᖏᑦ ᐱᐅᓂᖅᓴᐅᓱᒋᓪᓗᒋᑦ ᑎᒥᒧᑦ ᓂᐅᕕᕐᕕᔭᐃᑦ ᓂᕿᑦ ᐅᖅᓱᖏᓐᓂᑦ. ᑭᓯᐊᓂ, ᑕᒪᐃᑕᑲᓴᒃ ᑕᐃᒃᑯᐊ ᐊᐱᖅᓱᖅᑕᐅᔪᑦ ᐅᖃᓚᐅᖅᐳᑦ ᐃᓅᓱᒃᑐᑦ ᐃᓄᐃᑦ ᓂᕆᓂᖅᓴᐅᖃᑦᑕᕐᓂᕋᖅᑐᒋᑦ ᓂᐅᕕᕐᕕᔭᓄᑦ ᓂᕿᓄᑦ ᐅᖅᓱᓂᒃ, ᐊᒻᒪ 42 ᐳᓴᖏᑦ ᐅᖃᐅᑎᒋᓚᐅᖅᑐᑦ, ᐃᒻᒥᓂᒃ, ᓂᕆᓐᖏᓂᖅᓴᐅᖃᑦᑕᕐᓂᕋᖅᑐᑎᒃ ᓄᓇᒥᐅᑕᐃᑦ ᓂᕿᑦ ᐅᖅᓱᖏᓐᓂᒃ ᑕᐃᒃᓱᒪᓂᐅᕙᓚᐅᖅᓯᒪᔪᓂᑦ. ᑕᒪᐃᑕᑲᓴᒃ ᐃᓄᐃᑦ ᐱᐅᑦᓴᖅᐳᑦ ᓂᕆᖃᑦᑕᕐᓂᖅ ᓄᓇᒥᐅᑕᓂᒃ ᓂᕿᓂᒃ, ᑭᓯᐊᓂ ᐱᓇᓱᒋᐊᖏᑕ ᐱᒡᒐᓇᖅᑐᓂ, ᑕᒪᓐᓇ ᑕᐃᒪᐃᑎᑕᐅᓪᓗᓂ ᐃᓚᖓᒍᑦ ᐊᑭᑐᓗᐊᕐᓂᖓᓄᑦ ᐊᖑᓇᓱᓐᓂᐅᑉ ᐊᒻᒪ ᐱᑕᑭᓐᓂᖏᓐᓄᑦ ᐃᖏᕐᕋᔾᔪᑎᓴᐃᑦ ᐊᖑᓇᓱᓐᓂᕐᒧᑦ. ᐱᓇᓱᓐᓂᖅ ᓂᐅᕕᕐᕕᔭᓄᑦ ᓂᕿᓄᑦ ᐅᖅᓱᓂᒃ ᐱᔭᕆᐊᑭᓐᓂᖅᓴᒻᒪᕆᐅᓪᓗᓂ.

ᐃᓄᐃᑦ ᐊᐱᕆᔭᐅᕙᓚᐅᕆᕗᑦᑕᐅᖅ ᒥᒃᓵᓄᑦ ᐅᔾᔨᕈᓱᒃᓯᒪᓂᖏᓐᓂᒃ ᐅᖅᓱᖏᓐᓂᒃ ᐆᒪᔪᑦ ᐊᖑᓇᓱᒃᑕᐅᓲᑦ ᓂᕿᕆᔭᐅᓪᓗᑎᒃ. ᐊᒥᓱᑦ ᐅᓂᒃᑳᖅᐸᓚᐅᖅᑐᑦ ᐊᓯᕈᖅᓯᒪᓂᕋᐃᓪᓗᑎᒃ ᑕᐅᑦᑐᖏᓐᓂᒃ ᑕᖏᖏᓐᓂᓪᓗ, ᐃᔾᔪᑎᒋᓂᖏᓐᓂᒃ, ᐊᒻᒪ ᐅᖅᓱᖃᖅᑎᒋᓂᖏᓐᓂᒃ, ᐱᓗᐊᖅᑐᒥᒃ ᑐᒃᑐᐃᑦ. ᑕᐃᒪᐃᑦᑐᑦ ᐅᔾᔨᕈᓱᓐᓃᑦ ᓱᕐᕋᐅᑎᓂᖃᕈᓐᓇᑐᐃᓐᓇᕆᐊᖃᖅᐳᑦ ᓄᓇᓕᓐᓄᑦ ᖃᐅᔨᓴᖅᐸᓪᓕᐊᔾᔪᑕᐅᓗᑎᒃ ᓄᓇᓖᑦ ᐊᕙᑎᖏᑕ ᐊᓯᕈᕐᓂᖏᓐᓂᒃ.

ᐅᖅᓱᒃᑯᑦ ᓱᓇᑐᐃᓐᓇᕐᓂᒃ ᖃᐅᔨᓴᕐᓂᕐᒧᑦ ᖃᐅᔨᓴᕐᓂᖏᑦ ᐅᖅᓱᖏᓐᓂᒃ ᓄᓇᒥᐅᑕᐃᑦ ᓂᕿᑦ ᓇᓗᓇᐃᕈᑕᐅᕗᖅ ᑎᒥᒧᑦ ᐱᕙᓪᓕᐅᑎᓂᖏᓐᓄᑦ. ᑭᓯᐊᓂ, ᓱᓇᑐᐃᓐᓇᕐᓂᒃ ᖃᐅᔨᓴᕐᓂᕐᒧᑦ ᖃᐅᔨᓴᕐᓃᑦ ᐱᐅᓂᖅᓴᐅᓕᕈᑕᐅᒻᒪᕆᒍᓐᓇᖏᒻᒪᑕ ᓂᕆᔭᐅᕙᑦᑐᓄᑦ. ᑐᓴᖅᑕᐅᑎᑦᑎᓂᖅ ᑐᑭᓯᒋᐊᕈᑎᒃᓴᓂᒃ ᐃᓄᓐᓄᑦ ᓂᕿᑦᑎᐊᕙᐅᓂᖅᓴᓂᒃ ᓂᕈᐊᖃᑦᑕᕈᓐᓇᖁᓪᓗᒋᑦ ᐱᒻᒪᕆᐅᓪᓗᓂ ᐃᓚᒋᔭᐅᕗᖅ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᐱᓕᕆᐊᖑᔪᒧᑦ.

ᑕᐃᒃᑯᐊ ᐱᓕᕆᐊᖑᔪᒧᑦ ᐱᖃᑕᐅᔪᑦ ᐋᖅᑭᓱᐃᓇᓱᐊᖅᐳᑦ ᐱᔭᒃᓴᐅᑎᑦᑎᔾᔪᑕᐅᔪᓐᓇᖅᑐᓂᒃ ᖃᐅᔨᔭᐅᔪᓂᒃ ᖃᐅᔨᓴᕐᓂᒃᑯᑦ ᓄᓇᓕᒻᒥᐅᓄᑦ, ᐋᓐᓂᐊᖃᕐᓇᖏᑦᑐᓕᕆᔾᔪᓄᑦ ᐃᓱᒪᓕᐅᖅᑎᓄᑦ, ᐊᒻᒪ ᐋᓐᓂᐊᓯᐅᕈᑎᓂᒃ ᐱᑕᖃᖅᑎᑦᑎᔨᓄᑦ. ᐅᓂᒃᑳᓕᐅᕈᑎᑦ ᐊᒻᒪ ᓄᓇᓕᓐᓂ ᑲᑎᒪᓃᑦ ᐃᓚᒋᔭᐅᕗᑦ ᐸᕐᓇᒍᑎᒧᑦ. ᐊᒻᒪᑦᑕᐅᖅ ᑕᕐᕆᔮᖅ ᐱᓪᓚᑖᖅᓯᒪᔪᓂᒃ ᑕᐃᒍᖅᑕᐅᔪᖅ ᐃᒫᒃ ᐅᖅᓱᖅ, ᐊᓯᕈᖅᐸᓪᓕᐊᓂᖏᑦ ᖃᓄᐃᑦᑑᓂᖏᑕ ᐅᑭᐅᖅᑕᖅᑐᒥ ᐅᖅᓱᐃᑦ ᐊᒻᒪ ᐃᓄᐃᑦ ᓂᕆᔾᔪᓯᖓᑦ - ᐱᑕᖃᓛᖅᑐᖅ ᒫᓐᓇᕈᓗᒃ!


Return to Table of Contents

ᑲᖏᖅᑐᒑᐱᒃ ᐸᕐᓇᑉᐳᖅ ᓱᖏᐅᑎᓇᓱᐊᕐᓂᕐᒧᑦ ᐊᓯᕈᖅᐸᓪᓕᐊᔪᒧᑦ ᐊᕙᑎᒧᑦ

ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓ ᖃᐅᔨᓴᖅᑎᓄᑦ ᑲᑎᔾᔪᑕᐅᖃᑦᑕᖅᐳᖅ ᓇᑭᑐᐃᓐᓈᖅᓯᒪᔪᓄᑦ ᓯᓚᕐᔪᐊᕐᒥ ᐱᓕᕆᐊᖃᖅᑐᓄᑦ ᐊᒥᖅᑲᖅᑕᐅᔪᓂᒃ ᓱᓇᑐᐃᓐᓇᕐᓂᒃ ᖃᐅᔨᓴᕐᓂᒃᑯᑦ ᐱᓇᓱᐊᕈᒪᔭᓂᒃ. ᐃᓚᖏᑦ ᑕᒪᒃᑯᐊ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓ ᐱᓇᓱᐊᖃᑎᒌᑦ ᐃᓚᐅᔪᖃᖅᐳᑦ ᐱᓕᕆᖃᑎᒋᔭᐅᔪᓂᒃ ᑎᓴᒪᐅᔪᖅᑐᓂᑦ ᐅᑭᐅᖅᑕᖅᑐᒥ ᓄᓇᓕᕐᔪᐊᓂᑦ ᖃᐅᔨᕚᓪᓕᕆᐊᕈᒪᔪᓂᒃ ᖃᓄᖅ ᐅᑭᐅᖅᑕᖅᑐᒥ ᓄᓇᓖᑦ ᐊᑦᑐᖅᑕᐅᓯᒪᒻᒪᖔᑕ ᐊᓯᕈᖅᐸᓪᓕᐊᔪᓄᑦ ᐊᕙᑎᐅᑉ ᐊᒻᒪ ᐃᓅᓯᐅᑉ ᖃᓄᐃᑦᑑᓂᖏᑕ. ᓄᓇᓖᑦ ᓱᖏᐅᑎᓂᖏᑦ ᐊᒻᒪ ᐊᑦᑐᖅᑕᐅᔭᓐᓂᖏᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᑖᓐᓇ ᓯᓚᕐᔪᐊᓕᒫᕐᒥ ᐱᓕᕆᐊᖑᔪᖅ ᓴᓇᔾᔪᑕᐅᓚᐅᖅᑐᖅ ᓇᓕᒧᒐᓚᑦᑐᓂᒃ ᖃᐅᔨᓴᖅᑕᐅᔪᓂᒃ ᓇᒥᓕᒫᖅ ᐅᑭᐅᖅᑕᖅᑐᒥ. ᑐᕌᒐᖓᑦ ᑐᑭᓯᕚᓪᓕᕋᓱᐊᕐᓂᐅᓚᐅᖅᑐᖅ ᓄᓇᓖᑦ ᐊᑦᑐᖅᑕᐅᔭᒍᑎᖏᓐᓂᒃ ᐊᒻᒪ ᐊᓯᕈᖅᑐᓂᒃᑦ ᐃᑲᔪᕋᓱᐊᖅᑐᒋᑦ ᓴᓇᑎᓪᓗᒋᑦ ᐱᓕᕆᐊᖃᕋᓱᐊᓕᕈᑎᓂᒃ ᐸᕐᓇᒍᑎᓂᒃ ᐊᒻᒪ ᐱᓕᕆᔾᔪᑎᓂᒃ.

ᑲᖏᖅᑐᒑᐱᒃ ᐃᓚᒋᔭᐅᓚᐅᖅᐳᖅ ᖃᐅᔨᓴᖅᑕᓄᑦ. ᑐᕆᕗ ᐱᐊᓪ, ᑖᓐᓇ ᖃᐅᔨᓴᖅᑎ ᒥᒧᐊᕆᐊᓪ ᐃᓕᓐᓂᐊᕕᔾᔪᐊᕐᒥᑦ, ᐱᓕᕆᖃᑎᖃᓚᐅᖅᐳᖅ ᓄᓇᓕᒻᒥᒃ ᓇᓗᓇᐃᖅᓯᓇᓱᑦᑐᓂ ᐊᒃᓱᕈᕐᓇᖅᑐᓂᒃ ᐊᒻᒪ ᐊᑦᑐᖅᑕᐅᔭᒍᑎᓂᒃ ᐊᓯᕈᕐᓂᖏᓐᓄᑦ ᐊᕙᑎᖏᑦ, ᖃᐅᔨᒋᐊᖅᑐᓂᓗ ᐱᓕᕆᓯᒪᓂᖏᓐᓂᒃ ᑲᒪᒋᔭᖃᕋᓱᐊᖅᓱᑎᒃ ᐊᓯᕈᖅᑐᓂᒃ, ᐊᒻᒪᓗ ᓱᖏᐅᔾᔨᓂᕐᒧᑦ ᐱᓕᕆᔾᔪᑎᓴᓕᐊᕋᓱᐊᕐᓗᓂ. ᒪᑯᑎᒎᓇ ᐃᓕᓐᓂᐊᕐᓃᑦ, ᐊᐱᖅᓱᕐᓃᑦ, ᕿᒥᕐᕈᓂᖅ ᐊᒻᒪ ᐊᓯᖏᑦ ᖃᐅᔨᓴᕐᓂᖅ, ᓴᓇᓚᐅᖅᐳᑦ ᐱᓕᕆᔾᔪᑎᒃᓴᒥᒃ ᑲᖏᖅᑐᒑᐱᒻᒧᑦ.

ᑕᒪᐅᔪᑦ ᓄᓇᒥ ᐅᓗᕆᐊᓇᖅᑐᑦ ᑭᓪᓕᖃᕈᑕᐅᕗᑦ ᓄᓇᓖᑦ ᐸᕐᓇᒍᑎᓕᐅᕐᓂᖏᓐᓄᑦ ᐊᒻᒪ ᐱᓇᐃᓗᑕᐅᓪᓗᑎᒃ ᐊᐅᓚᔪᓐᓇᐅᑎᓄᑦ, ᒪᑯᓄᖓ ᐃᓪᓗᐃᑦ ᐊᒻᒪ ᐊᖅᑯᑎᑦ ᑲᖏᖅᑐᒑᐱᖕᒥ. ᑕᒪᒃᑯᐊ ᐃᓚᖃᖅᐳᑦ ᓯᔾᔭᒥ ᐅᓕᓐᓂᖃᓕᖅᐸᓪᓕᐊᓂᕐᒥᒃ ᐊᒻᒪ ᑎᓲᕋᕐᓂᕐᒥᒃ, ᓯᕐᒦᒍᑎᕙᓪᓕᐊᓂᕐᒥᒃ, ᑰᓲᑦ ᐊᓯᕈᓕᕐᓂᖏᓐᓂᒃ ᐊᒻᒪ ᓯᕕᖓᔮᑦ ᑎᓲᕋᕐᓂᐅᓴᓕᕐᓂᖏᓐᓂᒃ. ᖃᐅᔨᓴᖅᑎᑦ ᐱᓕᕆᖃᑎᖃᓚᐅᖅᐳᑦ ᓄᓇᓕᒻᒥᒃ ᖃᐅᔨᒋᐊᕋᓱᒃᑐᑎᒃ ᓄᓇᒥ ᑭᓪᓕᖃᕈᑕᐅᔪᓂᒃ ᐊᐅᓚᔪᓐᓇᐅᑎᖏᓐᓄᑦ ᐊᒻᒪ ᐃᓚᓕᐅᑎᔪᒪᓪᓗᒋᑦ ᓄᓇᓕᐅᑉ ᓱᖏᐅᑎᓇᓱᓐᓂᖓᓄᑦ ᐸᕐᓇᒍᑎᒧᑦ.

ᓄᓇᓖᑦ ᓱᖏᐅᑎᓂᖏᓐᓄᑦ ᐊᒻᒪ ᐊᑦᑐᖅᑕᐅᔭᓐᓂᖏᓐᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᖃᐅᔨᓴᖅᑎᑦ ᖃᐅᔨᓚᐅᖅᐳᑦ ᑕᒪᒃᑯᐊ ᐊᑦᑐᖅᑕᐅᔭᒍᑏᑦ ᐊᔾᔨᒌᓐᖏᑦᑕᕆᐊᖏᓐᓂᒃ ᓄᓇᓕᓐᓂ ᐅᑭᐅᖅᑕᖅᑐᓕᒫᕐᒥ. ᑕᐃᒃᓱᒪᓂᑦᓴᐃᓐᓇᖅ, ᐊᒥᓱᑦ ᐅᑭᐅᖅᑕᖅᑐᒥ ᓄᓇᓕᓐᓂ ᐊᔾᔨᒌᓐᓂᖃᖅᐳᑦ ᐱᔾᔪᓯᐅᓯᒪᔪᑦ ᓴᓐᖏᓂᖃᖅᑐᑎᒃ ᑕᐃᒫᒃᓴᐃᓐᓇᓕᓯᒪᓐᖏᑦᑐᑦ ᐃᓅᓯᒃᑯᑦ, ᑮᓇᐅᔭᓕᐅᕈᑎᑎᒍᑦ ᐊᒻᒪ ᐊᕙᑎᒃᑯᑦ ᐊᓯᕈᖃᑦᑕᖅᓯᒪᔪᑦ. ᐱᓕᕆᐊᖃᕋᓱᐊᕐᓂᖅ ᐊᓯᕈᕐᓂᕐᒥᒃ ᐱᑕᖃᖃᑦᑕᖅᓯᒪᕗᖅ ᐊᔾᔨᒌᓐᖏᑦᑐᓂ ᖁᓕᕇᓂ. ᐆᑦᑑᑎᒋᓗᒍ, ᐃᓄᐃᑦ ᐱᓕᕆᒋᐊᓕᒐᔪᓲᖑᒻᒪᑕᓕ ᐱᔾᔪᑎᖃᖅᑐᑎᒃ ᓄᓇᓕᓐᓂ ᐃᓱᒫᓗᓇᕆᔭᐅᔪᓂᒃ ᐃᓕᖓᔪᓂᒃ ᓂᕿᑦᓴᓄᑦ ᐊᒻᒪ ᐃᓅᓇᓱᐊᕈᑎᓄᑦ. ᓄᓇᓖᑦ ᓇᓗᓇᐃᖅᓯᒐᔪᖃᑦᑕᖅᓯᒪᓪᓗᑎᒃ ᖃᐅᔨᓴᖅᑕᐅᔭᕆᐊᓕᓐᓂᒃ ᐊᒻᒪ ᓄᓇᓕᓐᓂ ᐊᒻᒪ ᖁᕝᕙᓯᓐᓂᖅᓴᐃᑦ ᒐᕙᒪᐃᑦ ᐱᓕᕆᐊᖃᒐᔪᖃᑦᑕᓲᖑᓪᓗᑎᒃ ᐊᐅᓚᔪᓐᓇᐅᑎᓄᑦ ᑯᒃᓴᓇᕈᑎᓂᒃ.

ᖃᐅᔨᒪᕖᑦ?

ᑕᐃᒪ ᑭᖑᓪᓕᖅ ᐊᖏᔪᖅ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᓱᔭᒃᓴᐅᑎᑕᐅᓂᐊᖅᑐᖅ, ᓯᓚᕐᔪᐊᓕᒫᕐᒥ ᐅᖄᓚᐅᑎᒃᑯᑦ ᑲᑎᒪᓂᖅ ᑕᐃᒍᖅᑕᐅᔪᖅ ᐃᒫᒃ ᖃᐅᔨᒪᔭᓂᑦ ᐱᓕᕆᓂᕐᒧᑦ, ᐱᑕᖃᖅᑎᑕᐅᓂᐊᖅᑐᖅ ᒫᑐᓕᐊᒥ ᐄᐳᕈ 22-27, 2012. ᑲᑎᔾᔪᑕᐅᓂᐊᖅᑐᖅ ᒪᑯᓄᖓᐅᑭᐅᖅᑕᖅᑐᒥᖃᐅᔨᓴᖅᑎᑦ, ᐊᑐᐊᒐᓕᐅᖅᑎᑦ, ᕿᒥᕐᕈᔨᑦ, ᓄᓇᓕᒻᒥᐅᑦ, ᓴᓇᔪᓕᕆᔪᓂᒃ ᑭᒡᒐᑐᖅᑎᑦ, ᒐᕙᒪᐅᓐᖏᑦᑐᑦ ᑎᒥᐅᔪᑦ ᐊᒻᒪ ᐊᓯᖏᑦ ᐱᖃᑕᐅᔪᒪᔪᑦ ᐱᓇᓱᐊᖃᑎᒌᑦ ᐅᖃᒪᐅᑎᖃᕋᓱᐊᕐᓗᑎᒃ ᑭᖑᓪᓕᕐᒥ ᐱᓕᕆᐊᒃᓴᓂᒃ.


Return to Table of Contents

ᐱᒻᒪᕆᒃᖃᐅᔨᓴᕐᓂᖅᖃᐅᔨᒋᐊᕈᑕᐅᕗᖅ ᐃᓄᐃᑦ ᐃᓗᓯᖏᓐᓂᒃ

ᓄᓇᕗᒻᒥᐅᑦ ᖃᐅᔨᔪᒪᕗᑦ ᐃᓗᓯᕐᒥᒃ ᑐᑭᓯᒋᐊᕈᑎᒃᓴᓂᒃ ᐊᑐᕈᓐᓇᖅᑕᒥᓐᓂᒃ ᐃᓱᒪᒃᓴᖅᓯᐅᕐᓗᑎᒃ ᐊᒻᒪ ᐊᑐᐃᓐᓇᐅᒪᕙᓪᓕᐊᓇᓱᐊᕐᓗᑎᒃ ᐊᓯᕈᖅᑐᓄᑦ ᐊᑦᑐᖅᓯᓂᖃᖅᑐᓄᑦ ᓄᓇᓕᒻᒥᓐᓂᒃ. ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ, ᒪᒋᐅᓪ ᐃᓕᓐᓂᐊᕕᔾᔪᐊᕐᒥ ᖃᐅᔨᓴᖅᑎ ᒍᕋᐃᓯ ᐃᒋᓚᓐ ᓯᕗᓕᖅᑎᐅᓚᐅᖅᐳᖅ ᐃᓗᓯᕐᒥᒃ ᖃᐅᔨᓴᕐᓂᕐᒧᑦ ᐱᓕᕆᐊᖑᔪᒧᑦ ᓄᓇᕗᒻᒥ, ᐃᑲᔪᖅᓱᖅᑕᐅᓪᓗᑎᒃ ᐊᓯᖏᓐᓂᑦ ᑎᒥᐅᔪᓂᑦ ᐃᓚᒋᔭᐅᓪᓗᑎᒃ ᒐᕙᒪᖏᑦ ᓄᓇᕘᑉ ᐊᒻᒪ ᓄᓇᕗᑦ ᑐᓐᖓᕕᒃ ᑎᒥᖓᑦ. ᑐᕌᒐᖃᓚᐅᖅᐳᖅ ᐃᓄᐃᑦ ᐃᓗᓯᖏᓐᓂᒃ ᖃᐅᔨᓴᕐᓂᖅ ᖃᐅᔨᒋᐊᕋᓱᐊᕐᓂᕐᒥᒃ ᐃᓗᓯᖏᑕ ᖃᓄᐃᓕᖓᓂᖏᓐᓂᒃ ᐊᒻᒪ ᐊᖏᕐᕋᖃᕐᕕᖓ ᖃᓄᐃᑦᑑᓂᖏᓐᓂᒃ ᐃᓄᐃᑦ ᓄᓇᖃᖅᑐᑦ ᓄᓇᕗᒻᒥ.

2007-ᒥ ᐊᒻᒪ 2008-ᒥ ᖃᐅᔨᓴᖃᑎᒌᑦ ᐊᐱᖅᓱᓚᐅᖅᐳᑦ 1,374-ᓂᒃ ᐃᓪᓗᒥᐅᖃᑎᒌᓂᒃ ᐊᒻᒪ 1,923-ᓂᒃ ᐃᓄᓐᓂᒃ 18-ᓂᒃ ᐅᑭᐅᓕᓐᓂᒃ ᐊᖏᔪᑦᑎᓂᓪᓗ 25-ᓂ ᓄᓇᕗᒻᒥ ᓄᓇᓕᓐᓂ. ᑕᑯᓂᐊᓚᐅᖅᐳᑦ ᖃᐅᔨᒪᓇᕈᑎᒐᓚᓐᓂᒃ ᒪᑯᓄᖓ ᐃᓗᓯᖅ, ᓂᕆᔾᔪᓯᖅ, ᑯᒃᓴᓇᕈᑎ ᐆᒻᒪᑎᒃᑯᑦ ᐋᓐᓂᐊᑖᓂᕐᒥᑦ ᐊᒻᒪ ᑕᖅᑐᕈᑎᕐᓗᓐᓂᕐᒥᑦ, ᐊᒻᒪ ᐃᓱᒪᓕᕆᓂᖅ. ᐊᔾᔨᑲᓴᖓ ᓈᓴᐃᓂᖅ ᐱᓕᕆᐊᖑᓚᐅᖅᓯᒪᕗᖅ ᓄᓇᕕᒻᒥ 2004-ᒥ, ᐊᒻᒪ ᑖᓐᓇ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᖃᐅᔨᓴᕐᓂᖅ ᐱᓕᕆᐊᖃᓚᐅᕐᒥᔪᖅᑕᐅᖅ ᐃᓄᕕᐊᓗᐃᑦ ᓄᓇᑖᕐᕕᒋᓯᒪᔭᖓᓐᓂ ᐊᒻᒪ ᓄᓇᑦᓯᐊᕗᒥ, ᑕᐃᒪᐃᓯᒪᓂᖓᓄᑦ ᒫᓐᓇ ᒫᓐᓇᓕᓴᕐᒥᒃ ᖃᐅᔨᒪᔾᔪᑎᖃᓕᖅᑐᒍᑦ ᐃᓄᐃᑦ ᐃᓗᓯᖏᓐᓂᒃ ᓇᒥᑐᐃᓐᓇᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ.

ᐃᓪᓗᒥᐅᖃᑎᒌᑦ ᓇᓕᐊᑐᐃᓐᓇᖅ ᓂᕈᐊᖅᑕᐅᖃᑦᑕᓚᐅᖅᐳᑦ ᐊᒻᒪ ᑕᒪᐃᑕ ᐃᓄᐃᑦ 18-ᓂᒃ ᐅᑭᐅᓖᑦ ᐊᖏᔪᑦᑏᓪᓗ ᐱᖃᑕᐅᔪᓐᓇᓚᐅᖅᐳᑦ. ᐱᖃᑕᐅᔪᑦ ᐋᓐᓂᐊᓯᐅᖅᑕᐅᕕᒻᒥ ᖃᐅᔨᓴᖅᑕᐅᕙᓚᐅᖅᑐᑦ ᑲᓇᑕᐅᑉ ᐃᒪᖓᓂᒃ ᒥᐊᓂᖅᓯᔩᑦ ᐅᒥᐊᕐᔪᐊᖓᓐᓂ ᐊᒪᓐᓴᓐᒥ ᐊᖅᑯᓵᕋᐃᒻᒪᑦ ᓄᓇᖏᓐᓄᑦ. ᐊᐱᖅᓲᑎᑦ ᐊᐱᖅᓱᓚᐅᖅᐳᑦ ᒥᒃᓵᓄᑦ ᒪᑯᐊ ᐃᓪᓗᒥᐅᖃᑎᒌᑦ ᓂᓐᓂᐅᕐᓂᖏᑦ, ᓂᕿᑦᓴᖃᐃᓐᓇᕐᓂᖅ, ᓂᕿᑦᑎᐊᕙᐃᑦ, ᓄᓇᒥᐅᑕᐃᑦ ᓂᕿᑦ, ᓂᕆᔾᔪᓰᑦ, ᐃᓱᒪᓕᕆᓂᖅ, ᓄᓇᓕᒻᒥᐅᑦ ᖃᓄᐃᒍᑎᖃᓐᖏᓐᓂᖏᑦ ᐊᒻᒪ ᐋᓐᓂᐊᖃᑦᑕᖅᓯᒪᓂᖏᑦ. ᐋᓐᓂᐊᓯᐅᖅᑕᐅᕕᒻᒥ ᖃᐅᔨᓴᕐᓃᑦ ᐅᒥᐊᕐᔪᐊᕐᒥ ᐃᓚᖃᓚᐅᖅᐳᑦ ᑕᒪᐅᔪᓂᒃ ᖃᐅᔨᓴᖅᑕᐅᔾᔪᑎᓂᒃ ᖃᐅᔨᒋᐊᖅᑕᐅᓪᓗᑎᒃ ᐊᐅᑉ ᐳᓪᓚᖃᕐᓂᖓ, ᑎᓪᓕᕐᓂᒃ, ᐊᐅᑉ ᓱᑲᖃᕐᓂᖓ ᐊᒻᒪ ᑕᖅᑐᕈᑎᕐᓗᓕᑐᐃᓐᓇᕆᐊᖃᕐᓂᕐᒥᑦ ᑯᒃᓴᓇᕈᑎᑦ, ᑎᒥᓂᒃ ᐆᑦᑐᖅᓯᖃᑦᑕᕐᓂᖅ, ᓂᕿᑦᑎᐊᕙᑎᒍᑦ ᖃᓄᐃᓕᖓᓂᖅ ᐊᒻᒪ ᓱᕈᕐᓇᖅᑐᓄᑦ ᐊᑦᑑᑎᓯᒪᓂᖅ. ᖃᐅᔨᓴᖅᑎᑦ ᐊᒻᒪᑦᑕᐅᖅ ᐱᐊᕋᐃᑦ ᐃᓄᐃᑦ ᐃᓗᓯᖏᓐᓂᒃ ᖃᐅᔨᓴᓚᐅᕐᒥᔪᑦ ᓄᓇᕗᒻᒥ ᐱᐊᕋᕐᓂᒃ ᐅᑭᐅᓕᓐᓂᒃ 3-ᓂᑦ 5-ᓄᑦ. ᑖᓐᓇ ᖃᐅᔨᓴᕐᓂᖅ ᓵᓐᖓᔾᔪᑕᐅᓚᐅᖅᑐᖅ ᒪᑯᓄᖓ ᓂᕿᑦᑎᐊᕙᑦᑐᖃᑦᑕᕐᓂᖏᑦ, ᐱᕈᖅᐸᓕᐊᑦᑎᐊᕐᓂᖏᑦ ᐊᒻᒪ ᓴᐅᓂᖏᑦ, ᑕᐅᑐᑦᑎᐊᕐᓂᖏᑦ ᐊᒻᒪ ᐋᓐᓂᐊᖃᑦᑕᖅᓯᒪᓂᖏᑦ.

ᐃᓚᖏᑦ ᖃᐅᔨᔭᐅᔪᑦ ᓄᓇᕗᒻᒥ ᐃᓄᐃᑦ ᐃᓗᓯᖏᑕ ᖃᐅᔨᓴᖅᑕᐅᓂᖏᓐᓂᑦ ᐃᓐᓇᐃᑦ:

  • 75%-ᖏᑦ ᐱᖃᑕᐅᔪᑦ ᐊᖏᕐᕋᖃᓚᐅᖅᐳᑦ ᑭᒃᑯᑐᐃᓐᓇᕐᓄᑦ ᐃᓪᓗᒃᓴᓂ. ᐊᒥᓱᑦ ᐊᖏᕐᕋᐃᑦ ᐱᒻᒪᕆᓐᓂᒃ ᓴᓇᒋᐊᖅᑕᐅᔭᕆᐊᖃᖅᑐᑎᒃ. ᐃᓚᒌᑦ ᐱᐊᕋᓖᑦ ᐃᓪᓗᒥᐅᖃᑎᒌᑦ ᓂᓐᓂᐅᓚᐅᖅᑐᑦ.
  • ᐊᒥᓲᑎᒋᓂᖃᒐᔪᓚᐅᖅᐳᑦ ᐃᓪᓗᒥᐅᖃᑎᒌᑦ 4.6-ᓂᒃ ᐃᓄᓐᓂᒃ. ᐊᓯᖏᓐᓂ ᑲᓇᑕᒥᐅᑦ ᐃᓪᓗᒥᐅᖃᑎᒌᓂ ᐊᒥᓲᑎᒋᓂᖃᓲᖑᕗᑦ 2.5- ᓂᒃᑦ.
  • ᐃᓄᒃᑎᑐᑦ ᐅᖃᐅᓯᕆᔭᐅᒐᔪᓚᐅᖅᐳᖅ ᓄᓇᕗᒻᒥ ᐊᖏᕐᕋᓂ, ᑐᓪᓕᐅᓪᓗᓂ ᖃᓪᓗᓈᑎᑐᑦ.
  • 90%-ᖏᑦ ᐃᓪᓗᒥᐅᖃᑎᒌᑦ ᓱᐴᖅᑐᓲᖅᑕᖃᐅᖅᑐᑎᒃ, ᐊᒥᓲᑎᒋᓂᖃᒐᔪᑦᑐᑎᒃ ᒪᕐᕉᓐᓂᒃ ᓱᐴᖅᑐᓲᓐᓂᒃ ᐊᑕᐅᓯᕐᒥ ᐊᖏᕐᕋᒥ.
  • ᓂᕿᑦᓴᖃᐃᓐᓇᖏᓐᓂᖅ ᐊᑲᐅᓐᖏᓕᐅᕈᑎᐅᓚᐅᖅᑐᖅ. ᐃᖅᑲᓇᐃᔮᒃᓴᖅᑕᖃᓐᖏᓐᓂᖓ, ᑮᓇᐅᓕᐅᕐᓂᑭᓐᓂᖅ ᐊᒻᒪ ᓂᕿᑦ ᐊᑭᑐᓂᖏᑦ ᑕᐃᒪᐃᒍᑕᐅᓗᐊᓚᐅᖅᐳᑦ ᓂᕿᑦᓴᖃᐃᓐᓇᖏᓐᓂᕐᒧᑦ.
  • ᐱᖃᑕᐅᔪᑦ ᐱᐅᑦᓴᓂᖅᓴᐅᒐᓗᐊᖅᑐᑎᒃ ᓂᕆᖃᑦᑕᕐᓂᖅ ᓄᓇᒥᐅᑕᓂᒃ ᓂᕿᓂᒃ ᑭᓯᐊᓂ ᐊᑭᑐᓗᐊᕐᓂᖓ ᐱᓇᓱᐊᕐᓂᐅᑉ ᑕᒪᒃᑯᓂᖓ ᐱᒡᒐᓇᕈᑕᐅᓪᓗᓂ.
  • ᐅᖓᑖᓃᑦᑐᑦ 75%-ᖏᑕ ᐃᓪᓗᒥᐅᖃᑎᒌᑦ ᐸᔪᖃᑦᑕᓚᐅᖅᐳᑦ ᓄᓇᒥᐅᑕᓂᒃ ᓂᕿᓂᒃ ᐊᓯᒥᓐᓄᑦ ᓄᓇᒥᓐᓂ.
  • ᐅᖓᑖᓂ 70%-ᖏᑦ ᐱᖃᑕᐅᔪᑦ ᐅᓂᒃᑳᓕᐅᓚᐅᖅᐳᑦ ᐃᓗᓯᕐᒥᓐᓂᒃ ᐃᒫᒃ ᐱᐅᔪᖅ, ᐊᒃᓱᐊᓗᒃ ᐱᐅᔪᖅ ᐅᕝᕙᓘᓐᓃᑦ ᐱᐅᓪᓚᕆᑦᑐᖅ.
  • ᑕᖅᑐᕈᑎᕐᓗᓐᓂᖅ, ᑳᓐᓱ, ᐊᐅᒃᑯᑦ ᐳᓪᓚᖃᓗᐊᕐᓂᖅ ᐊᒻᒪ ᖁᕝᕙᓯᓐᓂᖓ ᑲᓕᔅᑐᕈᑉ ᐃᓗᓯᕐᒧᑦ ᐊᑲᐅᓐᖏᓕᐅᕈᑕᐅᒐᔪᓚᐅᖅᐳᑦ.
  • ᐱᓇᓱᐊᕈᓯᕐᒥ ᓯᕗᓂᖓᓂ ᖃᐅᔨᓴᕐᓂᐅᑉ, 84%-ᖏᑦ ᐱᖃᑕᐅᔪᑦ ᐱᓱᖃᑦᑕᖅᑐᒥᓂᐅᓚᐅᖅᐳᑦ ᑕᓪᓕᒪᓂ ᐅᓪᓗᓂ ᐊᑯᓂᐅᑎᒋᓂᖃᓪᓚᑐᖅᑐᑎᒃ 20 ᒥᓇᑦᓯᓂᒃ.
  • ᑕᒪᐃᑕᑲᓴᒃ ᐱᖃᑕᐅᔪᑦ ᓇᓗᓇᐃᖅᑕᐅᓚᐅᖅᐳᑦ ᐃᒪᐃᑦᑑᓪᓗᒋᑦ ᐅᖁᒪᐃᓗᐊᖅᑐᖅ ᐅᕝᕙᓘᓐᓃᑦ ᖁᐃᓂᓗᐊᖅᑐᖅ.
  • ᑕᒪᐃᑕᑲᓴᒃ ᐊᕐᓇᐃᑦ "ᑯᒃᓴᓇᖅᑐᒦᓐᓇᖅᑐᒥᒃ" ᕿᑎᖏᑦ ᐊᖏᑎᒋᓂᖃᓚᐅᖅᑐᑦ.
  • ᐃᓄᑐᖃᐅᓂᖅᓴᐃᑦ ᐱᖃᑕᐅᔪᑦ (ᐅᖓᑖᓃᑦᑐᑦ 40) ᓂᕆᓂᖅᓴᐅᖃᑦᑕᓚᐅᖅᐳᑦ ᓄᓇᒥᐅᑕᓂᒃ ᓂᕿᓂᒃ ᓴᓂᐊᓐᓂ ᐃᓅᓱᓐᓂᖅᓴᐃᑦ ᐱᖃᑕᐅᔪᑦ (ᑐᖔᓃᑦᑐᑦ 40).
  • 80%-ᑲᓴᖏᑦ ᐃᓐᓇᐃᑦ ᐃᒥᒐᖃᑦᑕᖅᑐᒥᓂᐅᓚᐅᖅᐳᑦ ᑕᖅᑭᕐᒥ ᓯᕗᓂᖓᓂ ᖃᐅᔨᓴᕐᓂᐅᑉ ᐊᒻᒪ ᐅᓂᒃᑳᓚᐅᖅᐳᑦ ᐃᒥᒐᖃᑦᑕᕐᓂᕋᖅᑐᑎᒃ 2 ᐅᕝᕙᓗ 3 ᖃᑦᑖᕐᔪᓐᓂᒃ ᐃᒥᒐᕐᓂᒃ ᐊᑕᐅᓯᕐᒥ ᐅᓪᓗᕐᒥ.
  • ᑕᒪᕐᒥᑲᓴᒃ ᐃᓄᐃᑦ ᐱᖃᑦᑕᑲᓐᓂᕆᐊᖃᖅᐳᑦ ᓄᒃᑭᒃᓴᐅᑎᒥᒃ D-ᒥᒃ.
  • ᐆᒻᒪᔪᓂᒃ ᐆᒻᒪᕕᖃᓲᓂᑦ ᐱᔪᑦ ᐋᓐᓂᐊᑦ ᐱᑕᖃᒐᔪᐃᑉᐳᑦ ᓄᓇᕗᒻᒥ.

Return to Table of Contents






ᓄᓇᐃᓪᓗ ᑕᕆᐅᖃᖏᑦᑐᒥᓗ ᐱᕈᖅᑐᑦ ᐆᒫᔪᐃᓪᓗ

ᕿᑭᖅᑖᓗᒻᒥ ᓄᓇᓖᑦ ᐃᓚᐅᕗᑦ ᓯᕐᒥᕐᒥᒃ ᖃᐅᔨᓴᖅᐸᓪᓕᐊᓂᕐᒧᑦ

ᕿᑭᖅᑖᓗᒻᒥ ᓄᓇᓖᑦ ᐱᒻᒪᕆᒃᑯᑦ ᐃᓚᐅᕗᑦ ᓇᐅᑦᑎᓱᕐᓂᒃᑯᑦ ᐊᓯᕈᕐᓂᖏᓐᓂᒃ ᓯᕐᒥᐅᑉ ᐅᑭᐅᖅᑕᖅᑐᒥ. ᐊᒻᒪ ᐊᓯᕈᖅᑐᖃᖅᐸᓪᓕᐊᕗᖅ. ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ, ᓱᓇᑐᐃᓐᓇᕐᓂᒃ ᖃᐅᔨᓴᖅᑎᑦ ᐃᓚᐅᖅᑐᑦ ᓯᓚᕐᔪᐊᓕᒫᕐᒥ ᐱᓕᕆᐊᖑᔪᒧᑦ ᑕᐃᒍᖅᑕᐅᔪᒧᑦ ᐃᒫᒃ ᐆᖅᑰᓇᕐᓂᖓᓄᑦ ᖃᓄᐃᓕᕐᓂᖓ ᓯᕐᒥᐅᑉ ᖃᐅᔨᓴᖃᑦᑕᓚᐅᖅᐳᑦ ᓂᓪᓕᓇᕐᓂᖓᓂᒃ ᖁᐊᑉ ᓄᓇᐅᑉ ᓇᒥᓕᒫᖅ ᓯᓚᕐᔪᐊᕐᒥ. ᖃᐅᔨᔭᖏᓪᓕ?

"ᐋᓐᓂᐊᓯᐅᖅᑕᖅ ᐆᓇᒐᓚᑦᑐᖅ," ᐅᖃᓚᐅᖅᑐᖅ ᐋᓐᑑᓂ ᓘᑯᕕᔅ, ᓯᕐᒥᕐᓂᒃ ᖃᐅᔨᓴᖅᑎ ᐃᓕᓐᓂᐊᕕᔾᔪᐊᖓᓂᑦ ᐋᑐᕚᑉ. "ᐅᖅᑰᓯᕙᓪᓕᐊᔪᖅ."

ᐃᓚᖓᑦ ᐱᐅᓂᖅᐹᖅ ᐊᑯᓂ ᓯᕐᒥᕐᒥᒃ ᑎᑎᕋᕈᑕᐅᓯᒪᔪᑦ ᑲᓇᑕᒥ ᐱᔭᐅᓯᒪᕗᑦ ᑲᓇᑕᐅᑉ ᐅᓇᓕᖏᑕ ᓇᔪᖅᑕᖓᓐᓂᑦ ᐊᓘᓐᒥᑦ ᐅᐊᓐᓇᖅᐸᓯᐊᓃᑦᑐᒥᑦ ᐊᐅᓱᐃᑦᑐᕐᒥᐅᑦ ᕿᑭᖅᑕᖓᑦᑕ, ᐅᖃᓚᐅᖅᑐᖅ ᑲᓇᑕᒥ ᐱᓕᕆᐊᖑᔪᒧᑦ ᓯᕗᓕᖅᑎᐅᖃᑕᖅ ᓯᐅᕋᓐ ᓯᒥᑦ ᓄᓇᒥᒃ ᖃᐅᔨᓴᖅᑎᑯᓐᓂᒥᐅᑕᖅ ᑲᓇᑕᒥ. "ᑎᑎᕋᖅᑕᐅᓯᒪᔪᑦ ᑲᓇᑕᐅᑉ ᐅᓇᓕᖏᑕ ᓇᔪᖅᑕᖓᓐᓂ ᐊᓘᓐᒥ ᐅᖓᑖᓂ 30 ᐅᑭᐅᑦ ᐊᑯᓂᐅᑎᒋᓂᖃᖅᓯᒪᕗᑦ ᐊᒻᒪ ᓇᓗᓇᐃᕈᑕᐅᓪᓗᑎᒃ ᓂᓪᓕᓇᕐᓂᖓᑕ ᓯᕐᒥᐅᑉ (-12-ᒥᑦ -15º-ᒧᑦ ᓯᐊᓪᓯᐊᔅ) ᓂᓪᓕᓇᕈᓐᓃᐹᓪᓕᖅᓯᒪᓂᖓᓄᑦ, ᐱᓗᐊᖅᑐᒥᒃ ᑕᐃᒪᓐᖓᑦ 1990-ᒐᓚᓐᓂᑦ, ᓂᓪᓕᓇᕈᓐᓃᐸᓪᓕᐊᑎᒋᓂᖃᖅᑐᓂ 0.1º ᓯᐊᓪᓯᐊᔅᒥᒃ ᐊᕐᕌᒍᑕᒫᑦ."

ᒫᓐᓇ, ᐱᓕᕆᖃᑎᒋᔭᐅᓪᓗᑎᒃ ᓄᓇᕘᑉ ᒐᕙᒪᖏᑦ ᐊᒻᒪ ᓄᓇᓖᑦ ᕿᑭᖅᑖᓗᒻᒥ, ᐊᓘᑦ ᐃᓚᒋᔭᐅᕗᖅ ᑐᓴᐅᖃᑎᒌᓄᑦ ᐃᓚᖃᖅᑐᓄᑦ ᐱᖓᓲᔪᖅᑐᓂᒃ ᓄᑖᓂᒃ ᓄᓇᓕᓐᓃᑦᑐᓂᒃ ᓯᕐᒥᕐᒥᒃ ᖃᐅᔨᓴᖅᐸᓪᓕᐊᕕᓐᓂᒃ. ᐃᓚᒋᔭᐅᓪᓗᑎᒃ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᐱᓕᕆᐊᖑᔪᒧᑦ, ᕿᑭᖅᑖᓗᒻᒥ ᓄᓇᓖᑦ ᐱᖃᑕᐅᓚᐅᖅᐳᑦ ᓂᕈᐊᕐᓂᕐᒧᑦ ᐊᒻᒪ ᐋᖅᑭᒃᓱᐃᓂᕐᒧᑦ ᓄᑖᓂᒃ ᖃᐅᔨᓴᖅᐸᓪᓕᐊᕕᓐᓂᒃ. ᐃᓚᐅᖃᑦᑕᐃᓇᕐᓂᐊᖅᐳᑦ ᐊᐅᓚᑎᑕᐅᓂᖏᓐᓄᑦ. ᐃᓚᓕᐅᔾᔭᐅᓂᖏᑦ ᓄᑖᑦ ᐃᓂᒋᔭᐅᔪᑦ, ᐃᓚᓕᐅᑎᓪᓗᑎᒃ ᐱᑕᖃᕇᖅᑐᒧᑦ ᐃᓂᒋᔭᐅᔪᒧᑦ ᐊᓘᓐᒥ, ᐱᒋᐊᕈᑕᐅᓯᒪᕗᖅ ᐅᐊᓐᓇᒥᑦ ᐱᖓᓐᓇᒧᑦ ᖃᐅᔨᓴᖅᐸᓪᓕᐊᕖᕕᓐᓄᑦ ᑲᓇᓐᓇᖅᐸᓯᐊᓂ ᐅᑭᐅᖅᑕᖅᑑᑉ ᐱᒋᐊᖅᓯᒪᔪᓄᑦ ᐅᐊᓐᓇᖅᐸᓯᐊᓂᑦ ᑯᐸᐃᑉ ᐅᐊᓐᓇᖅᐸᓯᐊᓄᑦ ᐊᐅᓱᐃᑦᑐᕐᒥᐅᑦ ᕿᑭᖅᑕᖓᑦᑕ.

ᑐᑭᓯᒋᐊᕈᑎᒃᓴᐃᑦ ᓴᖅᑭᐊᔪᑦ ᑕᒪᒃᑯᓇᓐᖓᑦ ᐃᓂᒋᔭᐅᔪᓂᑦ ᐊᑐᖅᑕᐅᒐᔭᖅᐳᑦ ᓴᓇᔭᐅᔪᒃᓴᓕᐅᕐᓂᒃᑯᑦ ᐋᖅᑭᓱᖅᑕᐅᓂᖏᓐᓄᑦ ᐊᒻᒪ ᐱᕙᓪᓕᐊᑎᑕᐅᓂᖏᓐᓄᑦ ᓯᓚᐅᑉ ᐊᓯᕈᕐᓂᖓᓄᑦ ᓱᖏᐅᑎᓂᕐᒧᑦ ᐸᕐᓇᒍᑎᑦ, ᐊᒻᒪᓗᑦᑕᐅᖅ ᓇᐅᑦᑎᓱᕈᑕᐅᓗᑎᒃ ᖃᓄᐃᓕᕐᓂᖓᓂᒃ ᓯᕐᒥᐅᑉ ᓇᒥᑐᐃᓐᓇᖅ ᓯᓚᕐᔪᐊᕐᒥ, ᓯᒥᑦ ᐅᖃᓚᐅᖅᐳᖅ.


Return to Table of Contents

ᓄᓇᓖᑦ ᐱᒻᒪᕆᒃᑯᑦ ᐃᓚᐅᓂᖃᖅᐳᑦ ᖃᐅᔨᓴᕐᓂᕐᒧᑦ ᐱᓕᕆᐊᖑᔪᒧᑦ

ᐃᓚᖓᑦ ᓇᓚᐅᑦᑖᖅᑕᐅᒐᔪᓛᑦ ᓴᖅᑭᖅᑐᓂᑦ ᓯᓚᐅᑉ ᐊᓯᕈᕐᓂᖓᓂᑦ ᑕᒪᓐᓇᐅᕗᖅ ᐅᐊᓐᓇᖅᐸᓯᒻᒧᑦ ᓄᑦᑎᐸᓪᓕᐊᓂᖓ ᓇᐹᖅᑐᓕᐅᑉ ᑭᓪᓕᖓᑕ. ᑭᓯᐊᓂ ᑕᐃᒪᐃᓐᓂᐊᖅᐸᖃᐃ? ᑕᐃᒪᐃᓕᕇᖅᐸᖃᐃ? ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᐱᓕᕆᐊᖑᔪᖅ, ᒫᓐᓇᒃᑯᑦ ᖃᓄᐃᓕᕙᓪᓕᐊᔪᑦ, ᑕᐃᒃᓱᒪᓂ ᐊᓯᕈᖅᓯᒪᔪᑦ, ᓇᒦᓐᓂᐅᑉ ᖃᖓᒃᑯᓪᓗ ᑕᐃᒫᒃᓴᐃᓐᓇᓕᓐᖏᓐᓂᖓ ᐅᑭᐅᖅᑕᖅᑐᖓᓂ ᑲᓇᑕᐅᑉ, ᐱᓕᕆᐊᖃᕈᑕᐅᓇᓱᐊᖅᐳᖅ ᑕᒪᒃᑯᓂᖓ ᐊᐱᖅᑯᑎᓂᒃ. ᒫᓐᓇᒃᑯᑦ ᖃᓄᐃᓕᕙᓪᓕᐊᔪᑦ, ᑕᐃᒃᓱᒪᓂ ᐊᓯᕈᖅᓯᒪᔪᑦ, ᓇᒦᓐᓂᐅᑉ ᖃᖓᒃᑯᓪᓗ ᑕᐃᒫᒃᓴᐃᓐᓇᓕᓐᖏᓐᓂᖓ ᐅᑭᐅᖅᑕᖅᑐᒥ ᓇᓗᓇᐃᖅᓯᕕᐅᔪᖅ ᑭᓪᓕᖓᓂᒃ ᐊᒻᒪ ᑐᑭᖃᖅᑐᓂ ᐃᒫᒃ, ᓱᓇᐃᓐᓇᐃᑦ ᓱᕐᕋᐅᑎᓂᖃᖅᑐᑦ ᓄᑦᑎᐸᓪᓕᐊᓂᕐᒧᑦ ᓇᐹᖅᑐᖃᕐᓂᕐᒥᑦ ᓇᑎᕐᓇᒧᑦ.

ᓄᓇᕗᒻᒥ, ᒫᓐᓇᒃᑯᑦ ᖃᓄᐃᓕᕙᓪᓕᐊᔪᑦ, ᑕᐃᒃᓱᒪᓂ ᐊᓯᕈᖅᓯᒪᔪᑦ, ᓇᒦᓐᓂᐅᑉ ᖃᖓᒃᑯᓪᓗ ᑕᐃᒫᒃᓴᐃᓐᓇᓕᓐᖏᓐᓂᖓ ᐅᑭᐅᖅᑕᖅᑐᖓᓂ ᑲᓇᑕᐅᑉ ᐃᑲᔪᖅᑕᐅᓚᐅᖅᐳᖅ ᓄᓇᓕᒻᒦᑦᑐᒧᑦ ᐱᓕᕆᐊᖑᔪᒧᑦ ᑕᐃᒍᖅᑕᐅᔪᒧᑦ ᐃᒫᒃ ᐊᔾᔨᓐᖑᐊᑦ ᐊᒻᒪ ᐱᕈᖅᑐᑦ ᐊᑯᓂᐅᔪᒥ, ᑖᓐᓇ ᑕᑯᒋᐊᕈᑕᐅᓚᐅᖅᑐᖅ ᐊᑦᑐᖅᓯᓂᖏᓐᓂᒃ ᐊᓯᕈᖅᐸᓪᓕᐊᔫᑉ ᓇᐹᖅᑐᓕᐅᑉ ᑭᓪᓕᖓᑕ ᐃᓗᓯᖏᓐᓂᒃ ᐊᒻᒪ ᖃᓄᐃᓐᓂᖏᓐᓂᒃ ᐅᑭᐅᖅᑕᖅᑐᒥᐅᑦ. ᐊᔾᔨᓐᖑᐊᑦ ᐊᒻᒪ ᐱᕈᖅᑐᑦ ᐊᑯᓂᐅᔪᒥ ᐃᓚᐅᑎᑦᑎᕗᖅ ᐊᒥᓱᓂᒃ ᐱᓕᕆᓪᓚᑖᕐᓇᖅᑐᓂᒃ ᖃᐅᔨᓴᕐᓂᕐᓂᒃ, ᐊᒻᒪᓗ ᑕᒪᒃᑮᓐᓂᒃ ᐱᖓᓐᓇᖅᐸᓯᒻᒥᐅᑦ ᓱᓇᑐᐃᓐᓇᕐᓂᒃ ᖃᐅᔨᓴᕈᓯᖓᓐᓂᒃ ᐊᒻᒪ ᓄᓇᓕᓐᓂ ᖃᐅᔨᒪᔭᓂᒃ.

2007-ᒥᑦ 2010-ᒧᑦ, ᓴᓂᑭᓗᐊᕐᒥᐅᑦ ᐊᒻᒪ ᑭᓐᖓᕐᒥᐅᑦ, ᐱᖃᑎᖃᖅᑐᑎᒃ ᖃᓪᓗᓈᑦ ᓄᓇᖓᓐᓂᑦ ᖃᐅᔨᓴᖅᑎᓂᒃ, ᓄᐊᑦᑎᓚᐅᖅᐳᑦ ᐊᒻᒪ ᐅᓂᒃᑲᐅᑎᖃᖅᑐᑎᒃ ᓄᓇᓕᐅᑉ ᓄᓇᖓᑕ ᐊᔾᔨᓐᖑᐊᖏᓐᓂᒃ ᐊᒻᒪ ᐱᕈᖅᑐᓂᒃ. ᑲᑎᖅᓱᒐᐃᑦ ᑎᑎᖅᑲᓕᐅᕈᑕᐅᓚᐅᖅᐳᑦ ᐊᒻᒪ ᑐᖅᑯᖅᑕᐅᓪᓗᑎᒃ, ᐊᒻᒪ ᑕᐃᒃᑯᐊ ᑐᑭᓯᒋᐊᕈᑎᒃᓴᐃᑦ ᑐᓴᖅᑕᐅᑎᑕᐅᓚᐅᖅᑐᑦ ᓄᓇᓕᒻᒥᐅᑦ ᑕᒪᐅᔪᑎᒍᑦ, ᒪᑯᑎᒎᓇ ᑐᑭᓯᒋᐊᕈᑎᒃᓴᐃᑦ ᑲᑎᑎᖅᓯᒪᔪᑦ ᑐᓂᐅᖅᑲᖅᑕᐅᓚᐅᖅᑐᑦ ᐃᓕᓐᓂᐊᕐᕕᓐᓄᑦ, ᓄᓇᓕᓐᓂ ᐃᓕᓐᓂᐊᖅᑐᑦ, ᐊᒻᒪ ᐊᑕᐅᓯᐅᓐᖏᑦᑐᒥᒃ ᐅᓪᓗᕐᒥᒃ ᓄᓇᒧᑦ ᐊᐅᓪᓚᐅᖅᓯᒪᓂᖅ.

ᖃᒪᓂ'ᑐᐊᕐᒥ, ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓄᑦ ᐃᓚᐅᑎᑦᑎᓇᓱᐊᕐᓂᖅ ᐃᓚᖃᓚᐅᖅᑐᖅ ᐊᒥᖅᑲᕐᓂᕐᒥᒃ ᐊᒻᒪ ᑐᓂᐅᖅᑲᐃᓂᕐᒥᒃ ᐊᔾᔨᓐᖑᐊᓂᒃ ᐊᒻᒪ ᐱᕈᖅᑐᓂᒃ ᐊᑯᓂᐅᔪᒥ ᑐᑭᓯᒋᐊᕈᑎᒃᓴᓂᒃ, ᐱᔾᔪᑎᒃᓴᓂᒃ, ᐊᒻᒪ ᓱᓇᒃᑯᑖᓂᒃ ᑕᒫᓂᒥᐅᑦ ᐃᓚᐅᔪᓐᓇᖁᓪᓗᒋᑦ ᐊᔾᔨᑲᓴᖓᓄᑦ ᓄᐊᑦᑎᔾᔪᓯᕐᒧᑦ ᐊᒻᒪ ᓇᓗᓇᐃᔭᐃᓪᓗᑎᒃ ᑕᒫᓂ ᐱᕈᖅᑐᓄᑦ ᐆᑦᑐᕋᐅᑎᓂᒃ ᐊᒻᒪ ᓄᓇᖓᑕ ᐊᔾᔨᓐᖑᐊᖏᓐᓂᒃ.

ᓄᓇᕗᒻᒥ, ᐊᒻᒪ ᓇᒥᑐᐃᓐᓇᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ, ᖃᓄᐃᓕᕙᓪᓕᐊᓂᖏᑦ ᓇᐹᖅᑐᓕᐅᑉ ᑭᓪᓕᖓᑕ ᐱᔭᕆᐊᑐᕗᑦ ᓇᓗᓇᐃᔭᕋᓱᐊᕐᓗᒋᑦ ᐊᒻᒪ ᒪᓕᒻᒪᕆᓐᖏᓚᑦ ᓯᓚᒥᒃ, ᐅᖃᓚᐅᖅᑐᖅ ᐱᓕᕆᐊᖑᔪᒧᑦ ᓯᕗᓕᖅᑎ ᑭᐅᕋᓐ Hᐋᐳ ᑖᓪHᐊᐅᓯ ᐃᓕᓐᓂᐊᕕᔾᔪᐊᕐᒥᐅᑕᖅ. ᐃᓚᖏᓐᓂ ᓄᓇᐃᑦ, ᑭᓪᓕᖓ ᓇᐹᖅᑐᖃᕐᓂᐅᑉ ᓇᑎᕐᓇᕐᒨᖓᔪᖅ ᓄᑦᑎᐸᓪᓕᐊᕗᖅ. ᐊᓯᖏᓐᓂᓕ, ᐊᓯᕈᖅᐸᓪᓕᐊᕙᓗᓐᖏᓚᖅ, ᐅᖅᑰᓯᕙᓪᓕᐊᒐᓗᐊᕐᒪᑦ.

"ᐱᒻᒪᕆᐅᓗᐊᖅᑐᑦ ᖃᐅᔨᔭᕗᑦ ᑕᒪᓐᓇᐅᖏᓐᓇᖅᐳᖅ ᐊᖏᔪᒥᒃ ᑕᐃᒫᒃᓴᐃᓐᓇᓕᓐᖏᓐᓂᖓ."

ᖃᐅᔨᒪᕖᑦ?

ᐅᐊᓐᓇᖅᐸᓯᓐᓂᖅᐹᑦ ᓯᕐᒥᕐᒥᒃᖃᐅᔨᓴᖅᐸᓪᓕᐊᕖᑦ ᓯᓚᕐᔪᐊᕐᒥ ᑕᐃᒃᑯᐊᖑᕗᑦ ᑕᓪᓕᒪᑦ ᐃᑰᑕᕐᒧᑦ ᐱᑕᖅᑕᐅᓂᑯᑦ ᐊᐅᓚᑎᑕᐅᓯᒪᓕᖅᑐᑦ 30-ᓄᑦ ᐅᑭᐅᓄᑦ ᐅᓇᓖᑦ ᓇᔪᖅᑕᖓᓐᓂ ᐊᓘᓐᒥ ᓄᓇᕗᒻᒥ.


Return to Table of Contents






ᐸᕐᓇᒃᑕᐅᓯᒪᔭᕆᐊᖃᓲᑦ ᐊᒻᒪᓗ ᐱᔪᓐᓇᐅᑎᓕᕆᓂᖅ ᓚᐃᓴᓐᓯᓂᒃ

ᐊᓯᐅᖅᑲᔪᓂᒃᕿᓂᕈᑎᑦ ᐃᓚᒋᐊᖅᑕᐅᔪᑦ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓄᑦ

ᑕᐃᒪᐃᒍᓐᓇᖅᑎᑕᐅᓪᓗᑎᒃ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓄᑦ ᐃᑲᔫᑎᓄᑦ ᑮᓇᐅᔭᓄᑦ ᒐᕙᒪᑐᖃᒃᑯᓐᓂᑦ, ᓄᓇᕗᑦ ᐱᑎᑕᐅᓯᒪᕗᖅ ᐱᒻᒪᕆᒃᑯᑦ ᐃᓚᒋᐊᖅᑕᐅᔪᓂᒃ ᕿᓂᕈᓐᓇᖅᑎᒋᓂᕐᒧᑦ: 12 ᓄᑖᑦ Hᐋᓐᑕᐃᑦ ᐊᑐᖅᑕᐅᖃᑦᑕᑐᒃᓴᐃᑦ ᐱᒡᒐᓇᖅᑐᒃᑯᑦ ᐊᐳᑎᒃᑯᑦ ᐊᒻᒪ ᓯᑯᒃᑯᑦ.

ᑕᐃᒃᑯᐊ ᐋᒍ ᐊᕕᓐᔪᔅ ᐃᖏᕐᕋᔪᓐᓇᖅᑐᑦ ᐊᐳᑎᒃᑯᑦ ᐊᒻᒪ ᒪᓴᒃᑯᑦ, ᐊᒻᒪ ᐳᑦᑕᔪᓐᓇᑎᐊᕐᓂᖏᓐᓄᑦ ᐃᑳᕈᑕᐅᔪᓐᓇᖅᑐᑦ ᒥᑭᔪᓂᒃ ᑕᓯᕐᓂᒃ ᐊᒻᒪ ᑰᒐᓛᓂᒃ. ᐊᑑᑎᖃᓗᐊᓲᑦ ᐅᐱᕐᖓᑦᓵᒃᑯᑦ, ᑕᒪᒃᑮᒃ ᐅᒥᐊᑦ ᐊᒻᒪ ᓯᑭᑑᑦ ᐊᑐᕋᑦᓴᐅᑎᐊᖅᑎᓐᓇᒋᑦ. ᑕᐃᒪᐃᓕᖅᑎᓪᓗᒍ ᖃᓂᒋᔮᓃᑦᑐᑦ 40 ᐳᓴᖏᑕ ᐊᓯᐅᖅᑲᔪᓂᒃ ᕿᓂᕐᓂᕐᒧᑦ ᐊᐅᓚᑎᑕᐅᔪᑦ ᐱᑕᖃᓲᖑᓪᓗᑎᒃ, ᐅᖃᓚᐅᖅᑐᖅ ᐃᑦ ᔭᐃᐱᑎ ᐊᖏᔪᖅᑳᖓᑦ ᓄᓇᕘᑉ ᓴᐳᔾᔨᔾᔪᑎᓂᒃ ᐱᔨᑦᑎᕋᐅᑎᓕᕆᕕᖓᓂ.

ᑕᐃᒃᑯᐊ ᐃᖏᕐᕋᔾᔪᑎᑦ ᐃᓂᖃᖅᑎᑕᐅᕗᑦ ᐅᑯᓇᓂ ᐊᕐᕕᐊᑦ, ᐃᖃᓗᒃᑑᑦᑎᐊᖅ, ᐃᒡᓗᓕᒃ, ᒥᑦᑎᒪᑕᓕᒃ, ᑕᓗᕐᔪᐊᖅ, ᑲᖏᖅᖠᓂᖅ, ᓴᓂᑭᓗᐊᖅ, ᐸᓐᓂᖅᑑᖅ, ᖁᕐᓗᖅᑐᖅ, ᐃᖃᓗᐃᑦ, ᓇᐅᔮᑦ ᐊᒻᒪ ᖃᒪᓂ'ᑐᐊᖅ.


Return to Table of Contents

ᐃᑲᔪᕐᓂᖅ ᐊᑦᑕᓈᕿᓂᐅᓴᓐᖏᓪᓗᑎᒃ ᐊᐅᓪᓚᖃᑦᑕᕐᓂᖏᓐᓂᒃ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓄᑦᖃᐅᔨᓴᖅᑎᑦ

ᑕᐃᒃᓱᒪᓂ ᓇᓗᓇᕈᓐᓃᕐᒪᑦ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓ ᑎᑭᕋᕈᑕᐅᓂᐊᕐᓂᖓᓄᑦ ᐊᒥᓱᓄᑦ ᖃᐅᔨᓴᖅᑎᓄᑦ ᐅᑭᐅᖅᑕᖅᑐᒧᑦ, ᑎᒥᐅᔪᑦ ᒪᑯᐊᒐᓚᐃᑦ ᑲᓇᑕᐅᑉ ᐸᓖᓯᒃᑯᖏᑦ (ᑲᓇᑕᐅᑉ ᐸᓖᓯᒃᑯᖏᑦ) ᐊᒻᒪ ᐃᒪᕐᒥᒃ ᒥᐊᓂᖅᓯᔨᓄᑦ ᐃᑲᔪᖅᑎᑦ ᐊᑐᐃᓐᓇᐅᒪᒋᐊᓕᓚᐅᖅᓯᒪᕗᑦ. ᑕᐃᒪᓐᖓᑦ 2007- ᒥᓂᑦ 100-ᖑᓗᐊᖅᑐᑦ ᓱᓇᑐᐃᓐᓇᕐᓂᒃ ᖃᐅᔨᓴᖅᑎᑦ ᐃᓚᐅᔪᑦ ᖁᓕᐅᓗᐊᖅᑐᓄᑦ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓂ ᐱᓕᕆᐊᖑᔪᓄᑦ ᐱᓕᕆᖃᑦᑕᖅᓯᒪᕗᑦ ᓇᒥᑐᐃᓐᓇᖅ ᓄᓇᕗᒻᒥ. ᑕᒪᐃᑕᑲᓴᒃ ᑎᑭᑉᐸᑉᐳᑦ ᐊᒻᒪ ᐊᐅᓪᓚᖅᑐᑎᒃ ᖃᓄᐃᓕᔪᖃᕋᑎᒃ, ᑭᓯᐊᓂ ᐃᑲᔪᖅᑕᐅᕗᑦ ᓄᓇᓕᒻᒦᑦᑐᓄᑦ ᑐᐊᕕᕐᓇᖅᑐᓕᕆᔨᓄᑦ ᐱᓕᕆᖃᑎᒌᓄᑦ.

"ᖁᔭᓇᖅᑐᑦ ᓄᓇᕐᔪᐊᑉ ᑲᔾᔨᖏᑦᑕ ᐅᑭᐅᖓᓄᑦ ᑮᓇᐅᔭᑦ, ᓱᓇᒃᑰᑖᖃᓕᖅᑎᒍᓐᓇᓚᐅᕋᑦᑎᒍ ᐊᑐᓂᑦ ᐃᒪᕐᒥᒃ ᒥᐊᓂᖅᓯᔨᓄᑦ ᐃᑲᔪᖅᑎᑦ ᐅᑭᐅᖅᑕᖅᑐᒦᑦᑐᑦ ᐊᓯᐅᖅᑲᔪᓂᒃ ᕿᓂᖅᑐᖅᓯᐅᑎᓂᒃ ᐃᓚᒋᔭᐅᓪᓗᑎᒃ ᒪᑯᐊ ᖃᕋᓴᐅᔭᓛᖅ, ᐳᑦᑕᖅᑯᑎᑦ ᐊᓐᓄᕌᑦ, ᖃᖓᑦᑕᖅᑎᑕᐅᓯᒪᔪᒃᑰᑦᑐᑦ ᐅᖄᓚᐅᑎᑦ ᐊᒻᒪ ᑕᒻᒪᕇᒃᑯᑎᑦ," ᐅᖃᓚᐅᖅᑐᖅ ᔮᒃ ᑯᕉᒍ, ᐊᓯᐅᖅᑲᔪᓂᒃ ᕿᓂᕐᓂᕐᒥᒃ ᐋᖅᑭᒃᓱᐃᔨ ᑲᓇᑕᐅᑉ ᐸᓖᓯᒃᑯᖏᓐᓄᑦ. ᐊᒻᒪᓗ ᓱᓕ, ᑲᓇᑕᐅᑉ ᐸᓖᓯᒃᑯᖏᑦ ᐱᔭᒃᓴᐅᑎᑦᑎᓚᐅᕆᕗᑦ ᑐᓴᐅᑎᓕᕆᓂᕐᒥᒃ ᐱᒋᐅᖅᓴᔾᔪᑎᒥᒃ ᓄᓇᓕᓐᓂ. ᐃᒪᕐᒥᒃ ᒥᐊᓂᖅᓯᔨᓄᑦ ᐃᑲᔪᖅᑎᑦ ᑕᓪᓕᒪᓂᒃ ᐅᒥᐊᖃᖅᐳᑦ ᐅᑯᓇᓂ ᐸᓐᓂᖅᑑᖅ, ᐃᖃᓗᒃᑑᑦᑎᐊᖅ ᐊᒻᒪ ᑲᖏᖅᖠᓂᖅ.


Return to Table of Contents